तिलक वर्माच्या नेतृत्वाखालील ‘इंडिया ए’ संघाने तिरंगी मालिकेच्या अंतिम फेरीत धडक मारली आहे. अफगाणिस्तान ‘ए’ संघाचा १०१ धावांच्या मोठ्या फरकाने पराभव करून भारताने अंतिम फेरीतील आपले स्थान निश्चित केले. याआधी, श्रीलंका ‘ए’ आणि अफगाणिस्तान ‘ए’ यांच्याविरुद्ध सलग सामने गमावल्यामुळे भारताचे स्पर्धेतील आव्हान धोक्यात आले होते. मात्र, अफगाणिस्तानविरुद्धचा शेवटचा सामना मोठ्या फरकाने जिंकून भारताने आपला ‘नेट रन रेट’ लक्षणीयरीत्या सुधारला आणि अंतिम फेरीतील जागा पक्की केली.
आता, अंतिम फेरीतील दुसऱ्या स्थानासाठी यजमान श्रीलंका ‘ए’ आणि अफगाणिस्तान ‘ए’ यांच्यात चुरशीची लढत होणार आहे. मालिकेतील शेवटचा साखळी सामना १९ जून रोजी डंबुला येथे श्रीलंका ‘ए’ आणि अफगाणिस्तान ‘ए’ यांच्यात खेळला जाईल. या सामन्याचा निकालच ठरवेल की अंतिम फेरीत ‘इंडिया ए’ विरुद्ध कोणता संघ खेळणार आहे.
अंतिम फेरीत पोहोचण्यासाठी श्रीलंका ‘ए’ संघाला केवळ अफगाणिस्तान ‘ए’ संघावर विजय मिळवण्याची गरज आहे. हा विजय एका धावेचा असो किंवा एका विकेटचा, त्याने काही फरक पडत नाही. सध्या श्रीलंकेकडे ४ गुण आहेत. जर त्यांनी हा सामना जिंकला, तर ते ६ गुणांसह गुणतालिकेत अव्वल स्थानावर पोहोचतील आणि ‘इंडिया ए’ विरुद्ध अंतिम सामना खेळतील.
त्यामुळे, श्रीलंका ‘ए’ संघाला ‘नेट रन रेट’ची चिंता करण्याची गरज नाही; त्यांच्यासाठी केवळ विजय महत्त्वाचा आहे.
अफगाणिस्तान ‘ए’ संघाची स्थिती
अफगाणिस्तान ‘ए’ संघासाठी अंतिम फेरीत पोहोचण्याकरिता केवळ श्रीलंकेचा पराभव करणे पुरेसे ठरणार नाही; त्यांना मोठ्या फरकाने विजय मिळवणे आवश्यक आहे. या शर्यतीत ‘नेट रन रेट’ निर्णायक भूमिका बजावेल. ‘इंडिया ए’ विरुद्ध अंतिम सामना खेळण्यासाठी, अफगाणिस्तानला १९ जून रोजी होणाऱ्या सामन्यात श्रीलंकेचा किमान १२१ धावांच्या फरकाने पराभव करावा लागेल. तसेच, जर त्यांना २५० धावांचे लक्ष्य मिळाले, तर ते लक्ष्य त्यांना २९ षटकांच्या आत पूर्ण करावे लागेल. केवळ अशा परिस्थितीतच अफगाणिस्तानचा ‘नेट रन रेट’ श्रीलंकेपेक्षा सरस ठरू शकेल.
सध्या अफगाणिस्तानकडे २ गुण आहेत आणि त्यांचा ‘नेट रन रेट’ -१.९८३ इतका आहे. त्यामुळे, श्रीलंकेचा पराभव करण्यासोबतच त्यांना आपला ‘नेट रन रेट’ देखील मोठ्या प्रमाणात सुधारावा लागेल.
तीन देशांच्या ‘अ’ संघांमधील मालिकेचा अंतिम सामना रविवारी, २१ जून रोजी दांबुला येथे खेळवला जाणार आहे. ‘इंडिया ए’ संघाने अंतिम सामन्यातील आपले स्थान आधीच निश्चित केले असले, तरी आता ‘श्रीलंका ए’ की ‘अफगाणिस्तान ए’ यांपैकी कोणता संघ त्यांच्याशी भिडणार, याकडे सर्वांचे लक्ष लागले आहे.
Comments are closed.