टीम इंडिया सावधान! वेस्ट इंडिजविरुद्धची आकडेवारी पाहता टेन्शनमध्ये मोठी वाढ; विजयाचा मार्ग कठीण?

​टी-20 विश्वचषकात टीम इंडियाचा पुढचा सामना आता वेस्ट इंडिजविरुद्ध होणार आहे. हा सामना १ मार्च रोजी कोलकाताच्या मैदानावर खेळवला जाईल. दोन्ही संघांसाठी हा सामना अत्यंत महत्त्वाचा असेल, कारण जो संघ हा सामना जिंकेल तो थेट उपांत्य फेरीत (सेमीफायनल) आपले स्थान निश्चित करेल. या सामन्यापूर्वीच टीम इंडियाची एक अशी आकडेवारी समोर आली आहे, जी पाहून टेन्शन वाढले आहे. वेस्ट इंडिजविरुद्ध जर भारतीय संघाने सावधानता बाळगली नाही, तर विश्वचषकातून बाहेर पडावे लागू शकते. ही भीतीदायक आकडेवारी नेमकी काय आहे, ते जाणून घेऊया.

​टी-20 विश्वचषकातील टीम इंडिया आणि वेस्ट इंडिज यांच्यातील आकडेवारी भारताच्या बाजूने दिसत नाहीये. आतापर्यंत या स्पर्धेत दोन्ही संघांमध्ये एकूण ४ सामने खेळले गेले आहेत. यापैकी ३ वेळा वेस्ट इंडिजने विजय मिळवला आहे, तर टीम इंडियाला केवळ १ वेळाच विजय मिळवता आला आहे.

​२००९ मध्ये आयसीसी टी-20 विश्वचषकात दोन्ही संघ पहिल्यांदा आमनेसामने आले होते, ज्यामध्ये वेस्ट इंडिजने विजय मिळवला होता. त्यानंतर २०१० मध्ये जेव्हा पुन्हा हे दोन्ही संघ भिडले, तेव्हा पुन्हा एकदा वेस्ट इंडिजने भारताचा पराभव केला. २०१४ मध्ये मात्र टीम इंडियाने वेस्ट इंडिजविरुद्धचा सामना ७ गडी राखून आपल्या नावावर केला होता. शेवटच्या वेळी २०१६ मध्ये दोन्ही संघ आमनेसामने आले होते, तेव्हा वेस्ट इंडिजने टीम इंडियाला पराभवाचा धक्का देऊन स्पर्धेतून बाहेर केले होते.

​टीम इंडियाला जर या टी-20 विश्वचषकात इतिहास घडवायचा असेल, तर हा जुना रेकॉर्ड विसरावा लागेल. वेस्ट इंडिजचा संघ या स्पर्धेत आतापर्यंत उत्कृष्ट कामगिरी करत आला आहे. अशा परिस्थितीत टीम इंडियाला हा सामना जिंकण्यासाठी प्रत्येक विभागात सर्वोत्तम खेळ दाखवावा लागेल. वेस्ट इंडिजचा संघ हा सामना पराभवानंतर खेळणार आहे, तर दुसरीकडे टीम इंडिया झिम्बाब्वेविरुद्धच्या विजयानंतर मैदानात उतरेल, जी भारतीय संघासाठी एक जमेची बाजू ठरू शकते.