मुंबईहून कसाऱ्याला जाणाऱ्या लोकलवर दरड कोसळल्याची घटना मंगळवारी रात्री घडली. कसारा स्थानकाजवळ ट्रॅक बदलत असताना शेजारच्या टेकडीवरील दरड कोसळली. या दुर्घटनेत दोन प्रवाशी गंभीर जखमी झाले आहेत. मोटरमनने सावधगिरी बाळगत लोकल कसारा स्थानकात आणली.
सीएसएमटी-कसारा लोकल रात्री 9 वाजण्याच्या दरम्यान कसारा रेल्वे स्थानकात येत होती. यावेळी प्लॅटफॉर्मसाठी ट्रॅक बदलत असतानाच ट्रॅक लागत असलेल्या उंच टेकडीवरील दरड अचानक कोसळली. सदर दरड ही थेट लोकलवर कोसळली. यात दरवाज्यात उभ्या असलेल्या दोन प्रवाशांना गंभीर दुखापत झाली आहे.
बाळू जाधव असे एका प्रवाशाचे नाव आहे. या दरडीमुळे लोकललाही काही प्रमाणात धक्का बसला. दरडीमुळे गंभीर दुखापत झालेल्या जखमींना आपत्ती व्यवस्थापन टीम कसाराचे सदस्य प्रमोद वारंगुसे यांनी लोकलमधील अन्य प्रवाशांच्या मदतीने कसारा रेल्वे स्थानकात उतरवले. रेल्वे पोलिसांना तात्काळ घटनेची माहिती देण्यात आली. आरपीएफने आपत्ती व्यवस्थापन टीमच्या सदस्यांच्या मदतीने जखमींना कसारा प्राथमिक आरोग्य केंद्र उपचारासाठी दाखल केले .
दरम्यान यावेळी रेल्वे स्थानकावर आवश्यक असलेले आपत्कालीन साहित्य उपलब्ध नव्हते. तसेच जीआरपीची मदत मिळाली नाही. सदर घटनेची माहिती रेल्वेच्या आपत्कालीन नियंत्रण कक्षाला मिळाल्यानंतर त्यांनी घटनास्थळी रेल्वे ट्रॅकवर आलेले दरड दगड बाजूला केले. यानंतर 9 वाजून 21 मिनिटांनी लोकल कसाऱ्याहून मुंबईकडे 15 मिनिटे उशिराने रवाना केली.
Comments are closed.