'निर्दयी' सरकारची उलटी गिनती सुरू!

पंतप्रधान मोदींची पश्चिम बंगालमध्ये तृणमूल काँग्रेसवर टीका : ‘जंगलराज’ संपवण्याचा निर्धार

वृत्तसंस्था/ कोलकाता

पंतप्रधान नरेंद्र मोदी यांनी शनिवारी पश्चिम बंगालची राजधानी कोलकाता येथे एका विशाल जनसभेला संबोधित केले. याप्रसंगी त्यांनी सत्ताधारी तृणमूल काँग्रेस सरकारवर सडकून टीका केली. राज्यात येत्या काही दिवसात विधानसभा निवडणुकांची घोषणा होणार असल्याच्या पार्श्वभूमीवर त्यांनी राज्यातील निर्दयी सरकारची उलटी गिनती सुरू असल्याचा दावा केला. तसेच राज्यातील ‘जंगलराज’ संपवण्याचा निर्धार क्यक्त करताना मुख्यमंत्री ममता बॅनर्जी यांना थेट लक्ष्य केले.

पंतप्रधान मोदींनी शनिवारी पश्चिम बंगाल राज्याच्या विकासात नवीन अध्यायाची सुरुवात करताना 18,000 कोटी रुपयांपेक्षा जास्त किमतीच्या प्रमुख पायाभूत सुविधा प्रकल्पांची पायाभरणी आणि उद्घाटन केले. प्रामुख्याने रस्ते, रेल्वे आणि बंदर पायाभूत सुविधांशी संबंधित हे प्रकल्प पश्चिम बंगाल आणि संपूर्ण पूर्व भारताच्या विकासाला एक नवीन गती देण्याचे उद्दिष्ट ठेवतात. या माध्यमातून राज्याच्या विकासाला मोठी चालना मिळणार असल्याचा दावा पंतप्रधानांनी केला आहे. हे प्रकल्प केवळ व्यापार आणि उद्योगाला चालना देणार नाहीत तर लाखो लोकांसाठी नवीन रोजगाराच्या संधी निर्माण करतील, असे मोदी म्हणाले. पंतप्रधानांनी विशेषत: रेल्वेच्या आधुनिकीकरणावर भाष्य करताना बंगाल या प्रयत्नात मागे राहणार नाही. केंद्र सरकार सामान्य लोकांचे जीवन सोपे करण्यासाठी रेल्वे पायाभूत सुविधांचा वेगाने विस्तार करत आहे. या प्रकल्पांच्या पूर्णत्वामुळे बंगालची आर्थिक परिस्थिती लक्षणीयरीत्या सुधारेल, असा विश्वास पंतप्रधानांनी व्यक्त केला.

तृणमूल काँग्रेस सरकारवर तीव्र हल्ला

विकास योजनांसह, पंतप्रधान मोदींनी पश्चिम बंगालमधील तृणमूल काँग्रेस (टीएमसी) सरकारवर सर्वात तीव्र हल्ला चढवला. त्यांनी राज्यातील सध्याच्या परिस्थितीची तुलना ‘जंगलराज’शी केली. हे जंगलराज संपवण्याची वेळ आली आहे. बंगालमध्ये बदल आता भिंतींवर लिहिलेला आहे आणि लोकांच्या हृदयात कोरला गेला आहे, असे ते म्हणाले. तसेच त्यांनी ममता बॅनर्जी यांच्या नेतृत्वाखालील सरकारला ‘निर्दयी सरकार’ असे संबोधत त्याच्या जाण्याची उलटी गिनती आता सुरू झाल्याचे वक्तव्यही केले.

कार्यकर्त्यांना रोखल्याचाही भाषणात उल्लेख

रॅलीदरम्यान मोठ्या संख्येने उपस्थित असलेल्या गर्दीला संबोधित करताना पंतप्रधानांनी तृणमूलच्या कार्यकर्त्यांनी भाजपच्या कार्यकर्त्यांच्या गर्दीचा ओघ रोखण्यासाठी सर्वतोपरी प्रयत्न केल्याचा आरोपही केला. कार्यकर्ते सभेसाठी येत असताना पूल बंद करण्यात आले, वाहने थांबवण्यात आली, वाहतूक रोखण्यात आली आणि लोकांना येऊ नये म्हणून भाजपचे झेंडे आणि पोस्टर देखील फाडण्यात आले. परंतु ते जनतेच्या या लाटेला रोखू शकणार नाहीत असे सांगताना बंगालमध्ये लवकरच कायद्याचे राज्य परत येईल आणि अत्याचार करणाऱ्यांना सोडले जाणार नाही, असा इशाराही दिला.