टी20 विश्वचषकात या दिवशी भिडणार भारत-पाक? टीम इंडिया पुन्हा आपला दबदबा कायम ठेवण्याच्या प्रयत्नात

भारत आणि पाकिस्तान (IND vs PAK) यांच्यातील क्रिकेट सामने नेहमीच रोमांचक ठरतात. आशिया कप 2025 मध्ये दोन्ही संघांमध्ये तीन सामने खेळले गेले आणि तिन्ही सामन्यांमध्ये टीम इंडियाचे वर्चस्व स्पष्ट दिसले. भारत सरकारनेही स्पष्ट केले आहे की, पाकिस्तानविरुद्ध भारत फक्त मल्टी-नेशन स्पर्धांमध्येच खेळणार आहे. त्यामुळे टीम इंडियाच्या सिनियर संघाची पाकिस्तानशी पुढची भिडंत कधी होणार, याबद्दल चाहत्यांमध्ये उत्सुकता आहे. टी20 विश्वचषक 2026 मध्ये दोन्ही संघ एकमेकांसमोर येऊ शकतात आणि त्याची संभाव्य तारीखही समोर आली आहे.

टी20 विश्वचषक 2026 मध्ये भारत आणि पाकिस्तान यांच्यात सामना खेळला जाणार आहे. रिपोर्ट्सनुसार, 15 फेब्रुवारीला कोलंबोमध्ये दोन्ही संघ भिडतील. हा सामना एका मोठ्या ब्लॉकबस्टरसारखा ठरू शकतो. कोणताही फॉरमॅट असो, पाकिस्तानविरुद्ध टीम इंडियाने नेहमीच आपला दबदबा राखला आहे. त्यामुळे टी20 विश्वचषकातही भारतीय संघ पाकिस्तानविरुद्ध आपले वर्चस्व कायम ठेवू शकतो.

टी20 विश्वचषक 2026 मध्ये टीम इंडियाचा पहिला सामना USA विरुद्ध होण्याची शक्यता आहे. मागील विश्वचषकात USA संघाने अपेक्षेपेक्षा चांगले प्रदर्शन केले होते, त्यामुळे 2026 च्या विश्वचषकातील त्यांची भारतविरुद्धची लढत पाहण्यासारखी असेल. रिपोर्ट्समध्ये असेही सांगण्यात आले आहे की, जर टीम इंडिया उपांत्य फेरीत पोहोचली, तर 5 मार्च 2026 रोजी वानखेडे स्टेडियमवर त्यांचा सामना होऊ शकतो. काही दिवसांपूर्वी अशी चर्चा सुरू होती की, टी20 विश्वचषक 2026 चे अंतिम सामने अहमदाबादच्या नरेंद्र मोदी स्टेडियमवर खेळले जातील. आता असेही समोर आले आहे की 8 मार्चला स्पर्धेचा अंतिम सामना होऊ शकतो.

2024 चा टी20 विश्वचषक भारताने जिंकला. त्यानंतर रोहित शर्मा, विराट कोहली आणि रवींद्र जडेजा यांसारख्या दिग्गजांनी टी20 क्रिकेटमधून निवृत्ती जाहीर केली. संघात आणखी काही बदलही झाले आहेत. ऋषभ पंत आता भारतीय टी20 संघाचा भाग नाही. अभिषेक शर्मा, शुबमन गिल, तिलक वर्मा, संजू सॅमसन, वरुण चक्रवर्ती यांसह अनेक खेळाडूंनी टी20 संघात आपली जागा पक्की केली आहे.