‘भुवीने पुनरागमनाचा विचारच केला नव्हता..', भुवनेश्वरच्या पुनरागमनावर या दिग्गजाचं मोठं विधान!

बीसीसीआयने (BCCI) काही दिवसांपूर्वी न्यूझीलंड दौऱ्यावर होणाऱ्या 5 सामन्यांच्या टी-20 मालिकेसाठी भारतीय संघाची घोषणा केली होती. (T20 Series between india vs New Zealand) या मालिकेसाठी भारतीय संघात अनुभवी वेगवान गोलंदाज भुवनेश्वर कुमारचे (Bhuvneshwar Kumar) तब्बल चार वर्षांनंतर पुनरागमन झाले आहे. त्याच्या पुनरागमनाबाबत भारताचा माजी क्रिकेटपटू आर. अश्विनने (R. Ashwin on Bhuvneshwar Kumar) मोठे विधान केले आहे. भुवनेश्वरचे भारतीय संघातील पुनरागमन हे त्याच्या सातत्यपूर्ण कामगिरीचे आणि उत्कृष्ट खेळाचे फळ असल्याचे अश्विनने म्हटले आहे.

आयपीएलमध्ये रॉयल चॅलेंजर्स बंगळुरू (RCB) आणि देशांतर्गत टी-20 क्रिकेटमध्ये आपल्या संघासाठी उत्कृष्ट कामगिरी केल्यानंतर या अनुभवी वेगवान गोलंदाजाला पुन्हा भारतीय संघात स्थान मिळाले आहे. अश्विनने त्याच्या पुनरागमनाचे श्रेय खेळावर लक्ष केंद्रित करण्याच्या वृत्तीला दिले आहे. न्यूझीलंडविरुद्धच्या पाच सामन्यांच्या टी-20 मालिकेला 22 ऑक्टोबरपासून सुरुवात होणार आहे. या मालिकेसाठी अनुभवी वेगवान गोलंदाज जसप्रीत बुमराहला विश्रांती देण्यात आली आहे.

रिपोर्ट्सनुसार, आर. अश्विनने आपल्या यूट्यूब चॅनेलवर सांगितले की, भुवनेश्वर कुमारने भारतीय संघात पुन्हा स्थान मिळेल, असा विचार कधीच केला नव्हता. त्याने केवळ रॉयल चॅलेंजर्स बंगळुरूसाठी पूर्ण मेहनतीने गोलंदाजी करण्यावर लक्ष केंद्रित केले. भारतीय संघात पुनरागमन करण्याची अपेक्षा ठेवण्याऐवजी त्याने आपले काम प्रामाणिकपणे केले. त्याच्या याच मेहनतीचे फळ म्हणून तब्बल चार वर्षांनंतर त्याला भारतीय संघात पुनरागमन करण्याची संधी मिळाली आहे.

अश्विनने पुढे सांगितले की, भुवनेश्वरच्या पुनरागमनानंतर मोहम्मद शमीच्या (Mohmmed Shami) आंतरराष्ट्रीय क्रिकेटमधील पुनरागमनाबाबतही चर्चा सुरू झाली आहे. एखाद्या खेळाडूला संघात पुनरागमन करायचे असेल आणि त्यासाठी तो पूर्ण मेहनत करण्यास तयार असेल, तर त्याच्यासाठी संधीचे दरवाजे नेहमी खुले असतात, असे अश्विनचे मत आहे.

याशिवाय, अश्विनने जसप्रीत बुमराहसोबतचे आपले संबंध मैत्रीपूर्ण आणि हास्यविनोदाचे असल्याचे सांगितले. तसेच, विराट कोहलीने भारतीय संघाचे कर्णधारपद सोडल्यानंतर त्याचे आणि कोहलीचे संबंध पूर्वीपेक्षाही अधिक चांगले झाल्याचे त्याने म्हटले आहे. यासोबतच, 2027 च्या वनडे विश्वचषकात भारत विजेतेपदाचा प्रबळ दावेदार असल्याचे मतही अश्विनने व्यक्त केले आहे.