टीम इंडियावर संकटांचा 'ट्रिपल’ अटॅक; बीसीसीआय आणि गौतम गंभीरच्या अडचणीत झाली वाढ!

गेल्या काही दिवसांत टीम इंडियाचे 3 स्टार खेळाडू जखमी झाले आहेत. या खेळाडूंच्या दुखापतीमुळे भारतीय संघाच्या अडचणीत भर पडली आहे. न्यूझीलंडविरुद्धच्या वनडे मालिकेत 2 खेळाडू खेळताना दिसणार नाहीत. मात्र, जर यापैकी 2 खेळाडू टी20 वर्ल्ड कप 2026 पूर्वी फिट झाले नाहीत, तर कर्णधार सूर्यकुमार यादव आणि मुख्य प्रशिक्षक गौतम गंभीर मोठ्या संकटात सापडतील. आता हे खेळाडू ‘सेंटर ऑफ एक्सलन्स’ मध्ये आपल्या फिटनेसवर काम करतील.

न्यूझीलंडविरुद्धच्या वनडे मालिकेपूर्वी रिषभ पंत जखमी झाला, ज्यामुळे त्याला संपूर्ण मालिकेतून बाहेर पडावे लागले आहे. पंतनंतर, पहिल्या वनडे सामन्यादरम्यान वॉशिंग्टन सुंदरलाही दुखापत झाली. आता सुंदर देखील वनडे मालिकेतून बाहेर झाला आहे. टी20 संघाचा महत्त्वाचा खेळाडू तिलक वर्मा देखील दुखापतीमुळे पहिल्या 3 टी20 सामन्यांतून बाहेर पडला आहे. तिलक वर्मा आणि वॉशिंग्टन सुंदर हे तर भारताच्या टी20 वर्ल्ड कप 2026 च्या संघाचाही भाग आहेत. अशा परिस्थितीत जर या दोन्ही खेळाडूंची दुखापत गंभीर झाली, तर टीम इंडिया मोठ्या अडचणीत येऊ शकते.