पाकिस्तानच्या बलुचिस्तान प्रांताची राजधानी क्वेट्टा येथे तेहरीक-ए-तालिबान पाकिस्तान (TTP) ने मध्यरात्री केलेल्या हल्ल्यात 21 पोलीस अधिकाऱ्यांना आपला जीव गमवावा लागला. यानंतर त्यांच्या कुटुंबीयांनी एकच गोंधळ घातला. क्वेट्टाच्या सिव्हिल हॉस्पिटलमध्ये कुटुंबीयांनी गोंधळ घातला.
बलुचिस्तानमधील झियारत भागात टीटीपीच्या हल्ल्यात मारल्या गेलेल्या पोलिस अधिकाऱ्यांच्या मृतदेहाचे पोस्टमॉर्टम करण्यात आले. त्यानंतर त्यांना क्वेट्टा पोलीस लाईन येथे अंत्यसंस्कारासाठी नेण्याची प्रक्रिया सुरू असताना मृतांच्या नातेवाईकांनी गोंधळ घातला.
कुटुंबीयांचा आरोप आहे की, यापूर्वी पाकिस्तानी लष्कराने पोलीस अधिकाऱ्यांना टीटीपीशी एकटे लढण्यासाठी सोडले होते. 3 तास फोर्स पाठवण्यात आला नाही आणि टीटीपीचे दहशतवादी जेव्हा पोलीस अधिकाऱ्यांचे मृतदेह घेऊन निघून गेले, तेव्हा लष्कराने मृतदेह शोधण्याचा प्रयत्नही केला नाही, त्यानंतर नातेवाईकांनी काल संपूर्ण दिवस मृतदेह शोधण्यात घालवला.
झियारतमध्ये पाकिस्तानी लष्कराच्या फ्रंटियर कॉर्प्सच्या जवानांनी मृत पोलिसांचे मृतदेह शोधून काढल्याचे दाखवण्यासाठी प्रथम मृतदेह कुटुंबीयांकडून हिसकावून घेतला आणि त्यानंतर पोलिसांचे मृतदेह क्वेट्टा येथील सिव्हिल हॉस्पिटलमध्ये नेण्याऐवजी मृतदेह पोलिस लाइन्समध्ये नेण्यात आले.
या कारणावरून मृत पोलिसांच्या कुटुंबीयांनी प्रथम सिव्हिल हॉस्पिटलबाहेर गोंधळ घातला आणि त्यानंतर सिव्हिल हॉस्पिटलमध्ये उपस्थित असलेल्या पाकिस्तानी लष्कराच्या फ्रंटियर कॉर्प्सच्या जवानांनी मृत पोलिसांच्या कुटुंबीयांचा पाठलाग करून त्यांना हाकलून दिले.
यावेळी उपस्थित हजारोंच्या जमावाने पाकिस्तानी लष्कराविरोधात घोषणाबाजी केली. “या दहशतवादामागे वर्दीचा हात आहे” आणि “लाज, लाज” अशा घोषणा देण्यात आल्या. पाकिस्तानी लष्कराच्या बलुचिस्तानमधील सर्वसामान्यांवर होणाऱ्या कारवाईमुळे दहशतवादी हल्ले वाढत असून पोलीसही त्याला बळी पडत असल्याचे स्थानिकांचे मत आहे. मृतदेह ताब्यात घेऊन कुटुंबीय सिव्हिल हॉस्पिटलबाहेर निदर्शने करत आहेत.
Comments are closed.