U19 विश्वचषक: विहान मल्होत्राच्या शतकासह भारताची चमक, सुपर 6 मध्ये झिम्बाब्वेचा 204 धावांनी पराभव करून विजयाने सुरुवात

विहान मल्होत्राने संयम आणि आक्रमकता यांचे उत्तम मिश्रण दाखवत 107 चेंडूत 7 चौकारांसह 109 धावांचे शानदार शतक झळकावले. त्याला साथ देत अभिज्ञान कुंडूनेही ६१ धावांची उपयुक्त खेळी केली. अखेरीस खिलन पटेलने अवघ्या 12 चेंडूत 30 धावा करत धावांचा वेग आणखी वाढवला. या खेळीमुळे भारतीय संघाने निर्धारित षटकांत 352 धावांची मोठी धावसंख्या उभारली.

झिम्बाब्वेकडून गोलंदाजी करण्यात तातेंडा चिमुगोरो सर्वात यशस्वी ठरला आणि त्याने 3 बळी घेतले. पानशे माझाई आणि सिम्बराशे मुडझेनगेरे यांनी प्रत्येकी 2, तर ध्रुव पटेलने 1 बळी घेतला.

353 धावांच्या लक्ष्याचा पाठलाग करण्यासाठी मैदानात उतरलेला झिम्बाब्वेचा संघ सुरुवातीपासूनच दडपणाखाली दिसला. सलामीवीर नॅथॅनियल हलबांगना खाते न उघडता बाद झाला, तर ध्रुव पटेल केवळ 8 धावा करू शकला. कर्णधार ब्रँडन सेंजेरेलाही केवळ 3 धावांची भर घालता आली.

मात्र, लेरॉय चिवोलाने संघर्ष दाखवत 77 चेंडूत 62 धावांची सर्वोच्च खेळी खेळली. मायकेल ब्लिग्नॉटने 37 धावा जोडल्या आणि ततेंडा चिमुगोरोनेही काही धावा केल्या, परंतु याशिवाय एकही फलंदाज भारतीय गोलंदाजांसमोर टिकू शकला नाही. झिम्बाब्वेचा संपूर्ण संघ 37.4 षटकात 148 धावांवर ऑलआऊट झाला.

भारताच्या गोलंदाजीत उद्धव मोहन आणि कर्णधार आयुष म्हात्रे यांनी चमकदार कामगिरी करत प्रत्येकी ३ बळी घेतले. आर.एस. अंबरीशने 2 तर खिलन पटेल आणि हेनिल पटेल यांनी प्रत्येकी 1 बळी घेतला.