उल्हासनगर दुहेरी हत्याकांडात मोठा ट्विस्ट! ज्याने दिली गोळीबाराची तक्रार, तो दीपक ठाकूरच निघाला

उल्हासनगर क्राईम न्यूज : उल्हासनगरमधील (Ulhasnagar) कैलास कॉलनी परिसरात घडलेल्या बहुचर्चित आणि गाजलेल्या दुहेरी हत्याकांड आणि गोळीबार प्रकरणात आता एक अत्यंत धक्कादायक खुलासा पोलीस तपासात समोर आला आहे. या गुन्ह्याला आता पूर्णपणे नवे वळण मिळाले असून, ज्या दीपक ठाकूर याने या हत्याकांडाची आणि गोळीबाराची तक्रार पोलिसांत दिली होती, तोच आता पोलीस तपासात मुख्य आरोपी ठरला आहे. हिललाईन पोलिसांनी (Hill Line Police) या प्रकरणी दीपक ठाकूर याच्यासह 8 जणांविरोधात गुन्हा दाखल केला असून तपासाची दिशा बदलली आहे.

Ulhasnagar Crime News: आधी बेदम मारहाण, कृत्य आले अंगाशी

पोलीस तपासातून समोर आलेल्या माहितीनुसार, 21 मे रोजी रात्री आरोपी अजय नरेश राव आणि त्याचा मित्र अभय विश्वकर्मा हे दोघे मोटारसायकलवरून कैलास कॉलनी परिसरातून जात होते. त्याच वेळी जुन्या वादाचा वचपा काढण्यासाठी त्यांना रस्त्यात अडवण्यात आले. त्यांना गाडीवरून खाली खेचून बेदम मारहाण करण्यात आली. याच दरम्यान तक्रारदार दीपक ठाकूर हा आपल्या इतर साथीदारांसह लोखंडी रॉड आणि लाठ्या-काठ्या घेऊन घटनास्थळी पोहोचला. त्यांनी अजय राववर प्राणघातक हल्ला केला आणि त्याच्या मोटारसायकलचीही मोठ्या प्रमाणावर तोडफोड केली.

या मारहाणीमुळे कमालीचा संतप्त आणि अपमानित झालेला अजय राव हा शांत बसला नाही. तो अवघ्या काही मिनिटांतच आपल्या इतर सशस्त्र साथीदारांना सोबत घेऊन पुन्हा घटनास्थळी परतला. त्याने कोणतीही शहानिशा न करता परिसरात अंदाधुंद गोळीबार सुरू केला. या भीषण गोळीबारात अनिल चौहान आणि अमन चौहान या दोन सख्ख्या भावांचा जागीच मृत्यू झाला, तर अर्जुन चौहान नावाचा एक तरुण गंभीर जखमी झाला. या एकाच घटनेने संपूर्ण उल्हासनगर शहर हादरून गेले होते.

Ulhasnagar Crime News: दोन्ही बाजूंच्या तक्रारींनंतर पोलिसांनी फिरवली तपासाची चक्रे

या प्रकरणाची सुरुवातीची तक्रार दीपक ठाकूर याने दिली होती, ज्यावरून पोलिसांनी अजय राव आणि त्याच्या टोळीवर हत्येचा गुन्हा दाखल केला होता. मात्र, त्यानंतर अजय रावच्या आईने दिलेल्या प्रति-तक्रारीच्या आधारे पोलिसांनी तांत्रिक आणि प्रत्यक्ष तपास केला असता मारहाणीचा हा धक्कादायक प्रकार समोर आला. जुन्या वादातून सुरू झालेल्या मारहाणीमुळेच पुढे हा रक्तरंजित गोळीबार घडल्याचे प्राथमिक तपासात सिद्ध झाले आहे.

Ulhasnagar Crime News: 8 जणांवर गुन्हा दाखल, वरिष्ठ अधिकाऱ्यांचे स्पष्टीकरण

पोलीस उपायुक्त (DCP) सचिन गोरे यांनी दिलेल्या माहितीनुसार, मारहाण आणि तोडफोडीच्या या घटनेप्रकरणी आता हिललाईन पोलिसांनी दीपक ठाकूर, किशोर चौहान आणि इतर आरोपींविरोधात विविध कलमांखाली गुन्हा दाखल केला आहे. या दुहेरी हत्याकांडात पोलिसांनी आधीच अनेक मुख्य आरोपींना अटक केली असून, आता या मारहाणीच्या घटनेचा आणि गोळीबाराचा परस्पर संबंध तपासून पुढील कडक कायदेशीर कारवाई केली जात आहे.

आणखी वाचा

Baramati Crime News : विधवेचा गैरफायदा घेऊन शरीरसुखाची मागणी, बारामतीमधील राष्ट्रवादीच्या नगरसेवकाविरोधात गुन्हा, किशोर मसाळांवर आता पक्षाकडूनही कारवाईचा बडगा!