लखनौ, १४ डिसेंबर. भारतीय जनता पक्षाच्या (भाजप) उत्तर प्रदेश युनिटच्या अध्यक्षपदी केंद्रीय मंत्री पंकज चौधरी यांची बिनविरोध निवड झाली आहे. त्याची औपचारिक घोषणा रविवारी करण्यात आली. चौधरी यांच्या निवडीची औपचारिक घोषणा केंद्रीय निवडणूक अधिकारी, केंद्रीय मंत्री पियुष गोयल यांनी केली. भाजप प्रदेशाध्यक्षपदासाठी चौधरी यांच्याशिवाय अन्य कोणत्याही उमेदवाराने अर्ज दाखल केला नव्हता.
अशात शनिवारीच त्यांच्या बिनविरोध निवडीचा मार्ग मोकळा झाला. यावेळी मुख्यमंत्री योगी आदित्यनाथ, केंद्रीय निवडणूक अधिकारी के. लक्ष्मण, उपमुख्यमंत्री ब्रजेश पाठक आणि केशव प्रसाद मौर्य यांच्यासह भाजपचे अनेक ज्येष्ठ नेते उपस्थित होते. पंतप्रधान नरेंद्र मोदी, गृहमंत्री अमित शाह आणि संरक्षण मंत्री राजनाथ सिंह यांचे विश्वासू नेते मानले जाणारे केंद्रीय अर्थ राज्यमंत्री पंकज चौधरी 2024 साली उत्तर प्रदेशच्या महाराजगंज मतदारसंघातून सातव्यांदा खासदार म्हणून निवडून आले. ते इतर मागासवर्गीयांमध्ये समाविष्ट असलेल्या कुर्मी समाजातून येतात.
उत्तर प्रदेशच्या राजकारणात कुर्मी समाजाचा मोठा प्रभाव मानला जातो. 2024 च्या लोकसभा आणि 2022 च्या उत्तर प्रदेश विधानसभा निवडणुकीत या समाजाने राज्यातील प्रमुख विरोधी पक्ष समाजवादी पक्षाकडे आपला कल दाखवला होता. कुर्मी मतदारांना आपल्या बाजूने जिंकून देण्याचा विश्वास भाजपने चौधरी यांच्यावर व्यक्त केल्याचे मानले जात आहे.
भाजपने याआधीच उत्तर प्रदेशात कुर्मी समाजाच्या नेत्यांना तीन वेळा प्रदेशाध्यक्ष म्हणून नियुक्त केले आहे. यामध्ये माजी खासदार विनय कटियार, माजी मंत्री ओमप्रकाश सिंह आणि जलशक्ती मंत्री स्वतंत्र देव सिंह यांचा समावेश आहे. भाजपचे नवनिर्वाचित प्रदेशाध्यक्ष पंकज चौधरी यांच्याकडे पुढील वर्षी होणाऱ्या पंचायत निवडणुका आणि 2027 च्या राज्य विधानसभा निवडणुकीत पक्षाला विजयापर्यंत नेण्याची महत्त्वाची जबाबदारी असेल.
चौधरी यांनी शनिवारी भाजपचे राज्य निवडणूक अधिकारी महेंद्र नाथ पांडे (माजी केंद्रीय मंत्री) आणि केंद्रीय निवडणूक निरीक्षक विनोद तावडे यांच्याकडे उमेदवारी अर्ज सादर केला. यावेळी उत्तर प्रदेशचे मुख्यमंत्री योगी आदित्यनाथ, उपमुख्यमंत्री केशव प्रसाद मौर्य आणि ब्रजेश पाठक आणि जलशक्ती मंत्री स्वतंत्र देव सिंह उपस्थित होते.
Comments are closed.