केंद्रीय मंत्री पियुष गोयल तीन देशांच्या दौऱ्यावर. अभिप्राय पाठवा

स्पेन, बेल्जियम, फिनलंडला भेट देणार

वृत्तसंस्था/ नवी दिल्ली

केंद्रीय मंत्री पियुष गोयल सोमवार, 13 जुलै रोजी स्पेन, बेल्जियम आणि फिनलंड या तीन देशांच्या दौऱ्यावर रवाना झाले. या भेटीत गोयल एका उच्चस्तरीय व्यावसायिक शिष्टमंडळाचे नेतृत्व करतील. आपल्या दौऱ्याच्या पहिल्या टप्प्यात गोयल सर्वप्रथम स्पेनमध्ये दाखल झाले आहेत. त्यानंतर ते 14 आणि 15 तारखेला बेल्जियमला भेट देत भारत-युरोपियन युनियन व्यावसायिक गोलमेज परिषदेत सहभागी होतील. त्यानंतर ते 16 आणि 17 तारखेला भारत-फिनलंड व्यावसायिक गोलमेज परिषदेत सहभागी होण्यासाठी फिनलंडला भेट देतील. या भेटीमुळे स्वच्छ ऊर्जा, डिजिटल तंत्रज्ञान, प्रगत उत्पादन, सेमीकंडक्टर, आरोग्यसेवा, रत्ने आणि दागिने यांसारख्या क्षेत्रांमधील सहकार्य वाढेल.

पियुष गोयल स्पेनमध्ये स्पॅनिश चेंबर ऑफ कॉमर्स, सीईओई आणि आयसीईएक्स स्पेन ट्रेड अँड इन्व्हेस्टमेंट यांच्यासोबत एका व्यावसायिक गोलमेज परिषदेत सहभागी होतील. या सत्रात, गोयल स्पेन आणि भारतातील उद्योगपतींसोबत ऑटोमोटिव्ह, नवीकरणीय ऊर्जा, रेल्वे, कृत्रिम बुद्धिमत्ता, सेमीकंडक्टर आणि अन्न प्रक्रिया यांसारख्या विषयांवर चर्चा करतील. तर, बेल्जियममध्ये परकीय गुंतवणूक, व्यापार, शाश्वत तंत्रज्ञान आणि पुरवठा साखळी यांसारख्या विषयांवर चर्चा करतील. फिनलंडच्या दौऱ्यादरम्यान, दूरसंचार, प्रगत उत्पादन, स्वच्छ ऊर्जा, गतिशीलता आणि नवोपक्रम या क्षेत्रांतील सहकार्याशी संबंधित विषयांवर चर्चा केली जाईल.