नाना पाटेकर हे भारतीय चित्रपटसृष्टीतील अत्यंत कसलेले आणि प्रभावी अभिनेते मानले जातात. त्यांनी जेव्हा-जेव्हा पडद्यावर भूमिका साकारली, तेव्हा आपल्या दमदार अभिनयाने प्रेक्षकांवर खोल ठसा उमटवला. आज ते मोठे स्टार असले तरी त्यांचा जीवनप्रवास मात्र संघर्षातून घडलेला आहे. गरिबीत गेलेले बालपण, लहान वयात कामाची जबाबदारी आणि कठोर परिश्रम यामुळेच त्यांचे व्यक्तिमत्त्व घडले. १ जानेवारी १९५१ रोजी जन्मलेल्या नाना पाटेकर आज आपला ७५वा वाढदिवस साजरा करत आहेत. या निमित्ताने त्यांच्या आयुष्यातील काही कमी परिचित पैलूंवर नजर टाकूया.
नाना पाटेकर (Nana Patekar)यांनी अवघ्या १३व्या वर्षी कामाला सुरुवात केली होती. उदरनिर्वाहासाठी त्यांनी एकेकाळी चूनाभट्टीत काम केले तसेच चित्रपटांचे पोस्टर रंगवण्याचे कामही केले. दोन वेळच्या जेवणासाठी झगडताना त्यांनी हळूहळू अभिनयाच्या क्षेत्रात पाऊल टाकले. त्यांच्या चित्रपट कारकिर्दीची सुरुवात १९७८ साली प्रदर्शित झालेल्या ‘गमन’ या चित्रपटातून झाली. मात्र, १९८९ मध्ये आलेल्या ‘परिंदा’ या चित्रपटातील खलनायकाच्या भूमिकेमुळे त्यांना खरी ओळख मिळाली. या भूमिकेसाठी त्यांना सर्वोत्कृष्ट सहाय्यक अभिनेत्याचा राष्ट्रीय चित्रपट पुरस्कारही मिळाला.
इतका मोठा कलाकार असूनही नाना पाटेकर अतिशय साधी जीवनशैली जगतात. कोट्यवधींची संपत्ती असतानाही ते झगमगाटापासून दूर राहणे पसंत करतात. विशेष म्हणजे, ते मुंबईत राहत नाहीत. अमिताभ बच्चन यांच्या ‘कौन बनेगा करोडपती’ या कार्यक्रमात त्यांनी स्वतः सांगितले होते की, त्यांना शहरापेक्षा गावात राहणे अधिक आवडते आणि त्यांनी बिग बींनाही आपल्या गावाला येण्याचे आमंत्रण दिले होते.
नाना पाटेकर यांचे पुण्याजवळ खडकवासला परिसरात सुमारे २७ एकरांवर पसरलेले फार्महाऊस आहे. याच ठिकाणी ते वास्तव्यास असून शेतीही करतात. त्यांच्या घरात साधे लाकडी फर्निचर, टेराकोटा फ्लोअरिंग आणि सात खोल्या आहेत. फार्महाऊसमध्ये त्यांनी अनेक गायी-म्हशीही पाळल्या आहेत. याशिवाय मुंबईच्या अंधेरी भागात त्यांचा एक १ बीएचके फ्लॅट असून तो त्यांनी ९०च्या दशकात खरेदी केला होता.
अभिनयासोबतच समाजकार्याचीही नाना पाटेकरांना विशेष आवड आहे. २०१५ साली मराठवाडा आणि लातूर भागातील दुष्काळग्रस्त शेतकऱ्यांना त्यांनी आर्थिक मदत केली होती. सुमारे १०० बाधित शेतकरी कुटुंबांना धनादेश वाटप करण्यात आले होते. इतकेच नव्हे तर शेतकऱ्यांच्या मदतीसाठी त्यांनी एक स्वयंसेवी संस्थाही सुरू केली आहे. अभिनय, साधेपणा आणि सामाजिक जाणीव यांचा दुर्मिळ संगम म्हणजे नाना पाटेकर, असेच म्हणावे लागेल.
दैनिक बोंबाबोंबचा व्हॉट्सॲप ग्रुप जॉईन करण्यासाठी या लिंकवर क्लिक करा
हेही वाचा
क्रिती सेननने भावनिक पोस्टसह २०२५ ला दिला निरोप; लिहिले, ‘या वर्षाने मला…’
Comments are closed.