टीम इंडियाचा स्टार फलंदाज विराट कोहली 2027च्या विश्वचषकात खेळण्यासाठी कठोर परिश्रम घेत आहे. कसोटी आणि टी20 मधून निवृत्ती घेतल्यानंतर त्याचे भविष्य धोक्यात आले होते, परंतु कोहली त्याचा आवडता फॉरमॅट तसाच सोडणार नाही. या वर्षी आंतरराष्ट्रीय क्रिकेटमध्ये धुमाकूळ घालल्यानंतर, कोहली देशांतर्गत क्रिकेटमध्येही आपले कौशल्य सिद्ध करत आहे. बुधवार, 24 डिसेंबर रोजी सुरू झालेल्या विजय हजारे ट्रॉफीच्या पहिल्याच सामन्यात त्याने शतक झळकावले. लिस्ट ए क्रिकेटमधील त्याच्या गेल्या चार डावांमधील हे त्याचे तिसरे शतक आहे. किंग कोहलीचा जबरदस्त फॉर्म पाहून, त्याचे बालपणीचे प्रशिक्षक राजकुमार शर्मा यांनी स्पष्ट केले आहे की विराट 2027च्या विश्वचषकासाठी पूर्णपणे सज्ज आहे आणि त्याच्यापेक्षा मोठा मॅच विनिंग खेळाडू भारतात जन्माला आलेला नाही.
एएनआयशी बोलताना राजकुमार शर्मा म्हणाले, “हे खूप चांगले आहे, त्याने भारतासाठी दोन शतके झळकावत आपला फॉर्म कायम ठेवला आहे. त्याने आज त्याच लयीत शानदार फलंदाजी केली, ज्यामुळे दिल्लीला सामना जिंकण्यास मदत झाली. तो बऱ्याच काळानंतर घरगुती क्रिकेट खेळत होता. त्याने एक शानदार खेळी केली.
बघा, तो उत्कृष्ट फॉर्ममध्ये आहे. त्याने भारतासाठी त्याच्या शेवटच्या दोन्ही सामन्यांमध्ये शतके झळकावली आहेत. तो उत्कृष्ट फॉर्ममध्ये आहे. तो सर्वात सातत्यपूर्ण खेळाडू आहे; माझ्या मते, तो विश्वचषकासाठी पूर्णपणे तयार आहे.
तो इतका महान क्रिकेटपटू आहे की त्याला कधी कोणते बदल करावे लागतील हे त्याला माहिती आहे. तो सातत्यपूर्ण आहे, कधीकधी असा टप्पा येतो जिथे एक किंवा दोन डाव खराब होतात. याचा अर्थ असा नाही की तो वाईट खेळाडू आहे. त्याचे रेकॉर्ड दाखवतात की तो मोठ्या उंचीवर पोहोचला आहे.
Comments are closed.