IND vs AUS: विराट कोहली इंग्लंडहून ऑस्ट्रेलियाला जाणार नाही? जाणून घ्या सविस्तर ऑस्ट्रेलिया दौऱ्याची योजना

भारत आणि ऑस्ट्रेलिया (IND vs AUS) यांच्यात वनडे आणि टी20 मालिका खेळली जाणार आहे. टीम इंडियाचा ऑस्ट्रेलियाचा दौरा 19 ऑक्टोबरपासून सुरू होणार आहे.

रिपोर्टनुसार, ऑस्ट्रेलियाच्या दौऱ्यासाठी भारतीय संघ 15 ऑक्टोबरला रवाना होणार आहे. भारतीय खेळाडू दोन बॅचमध्ये ऑस्ट्रेलियाला जाणार आहेत. भारतीय संघाच्या काही खेळाडूंची फ्लाइट 15 ऑक्टोबर सकाळी जाईल, तर बाकीची फ्लाइट संध्याकाळी रवाना होईल.

भारतीय संघाचा स्टार खेळाडू विराट कोहली (Virat Kohli) सध्या लंडनमध्ये आपल्या कुटुंबासोबत आहे. विराट ऑस्ट्रेलियाविरुद्ध वनडे मालिकेत खेळणार आहे. ऑस्ट्रेलियाच्या दौऱ्यासाठी कोहली इंग्लंडहून आधी भारतात येईल आणि नंतर संघासोबत ऑस्ट्रेलियाला रवाना होईल.

पीटीआयने आपल्या रिपोर्टमध्ये बीसीसीआयच्या सूत्रांवरून सांगितले की, विराट कोहली, रोहित शर्मा आणि श्रेयस अय्यर ऑस्ट्रेलियाच्या दौऱ्यासाठी रवाना होऊ शकतात. विराट आणि रोहित 15 ऑक्टोबर किंवा त्यापूर्वी दिल्लीमध्ये पोहोचू शकतात. इथूनच भारताचे सर्व खेळाडू ऑस्ट्रेलियाच्या दौऱ्यासाठी निघतील.