इराणवर शनिवारी (28 फेब्रुवारी) अमेरिकेने हल्ले केल्यानंतर अमेरिकेचे राष्ट्राध्यक्ष डोनाल्ड ट्रम्प यांनी मोठे विधान केले आहे. अमेरिकेने इराणमध्ये मोठ्या लढाऊ कारवाया सुरू केल्याचे त्यांनी जाहीर केले. आपल्या सोशल मीडिया अकाऊंट ‘ट्रुथ सोशल’वर प्रसिद्ध केलेल्या व्हिडिओ संदेशात त्यांनी सांगितले की, या लष्करी मोहिमांचा उद्देश अमेरिकन नागरिकांचे संरक्षण करणे आणि इराणी शासनाकडून निर्माण होणारे धोके संपवणे हा आहे.
ट्रम्प यांनी इराणला अत्यंत कठोर आणि धोकादायक गट संबोधले. अमेरिका इराणला कधीही अण्वस्त्रे मिळवू देणार नाही, असे त्यांनी स्पष्ट केले. त्यांच्या मते, इराणने आपला अणुकार्यक्रम पुन्हा उभा करण्याचा प्रयत्न सुरू केला असून तो लांब पल्ल्याच्या क्षेपणास्त्रांच्या विकासात गुंतलेला आहे, ज्यामुळे अमेरिका आणि तिच्या सहयोगी देशांसाठी मोठा धोका निर्माण होतो.
क्षेपणास्त्रे आणि नौदल उद्ध्वस्त करण्याचा इशारा
ट्रम्प यांनी ठाम शब्दांत सांगितले की, “आम्ही त्यांच्या क्षेपणास्त्रांचा नाश करू.” तसेच तेहरानची क्षेपणास्त्र उद्योगव्यवस्था पूर्णपणे जमीनदोस्त करू, असेही त्यांनी म्हटले. अमेरिका इराणच्या नौदलाचा पूर्णपणे नायनाट करेल आणि तेहरानला कधीही अण्वस्त्रे मिळू देणार नाही, अशी भूमिकाही त्यांनी मांडली. याशिवाय, ट्रम्प यांनी इराणच्या इस्लामिक रिव्होल्युशनरी गार्ड कॉर्प्सला (आयआरजीसी) शरणागती पत्करण्याचे आवाहन केले आहे.
मध्यपूर्वेत युद्धनौकांची तैनाती
अमेरिका हे हल्ले स्वतंत्रपणे करत आहे की इस्रायलच्या सहकार्याने, याबाबत ट्रम्प यांनी स्पष्ट केले नाही. मात्र एका अमेरिकी अधिकाऱ्याने सांगितले की इराणविरुद्धची कारवाई हवाई तसेच समुद्री मार्गाने केली जात आहे.
गेल्या काही आठवड्यांत अमेरिकेने मध्यपूर्वेत मोठ्या प्रमाणावर युद्धनौकांची तैनाती केली आहे. ट्रम्प यांनी याला “भव्य नौदल ताफा” असे संबोधले.
‘फोर्ड’ आणि ‘अब्राहम लिंकन’ची तैनाती
इराणवरील कारवाईसाठी अमेरिकेने जगातील सर्वात मोठ्या युद्धनौकांपैकी दोन – USS Gerald R. Ford आणि USS Abraham Lincoln – मध्यपूर्वेत तैनात केल्या आहेत.
‘फोर्ड’ ही अमेरिकेची सर्वात नवी आणि जगातील सर्वात मोठी विमानवाहू युद्धनौका असून त्यात अणुभट्टी प्रणाली बसवलेली आहे.
तणाव वाढला
ट्रम्प यांच्या या आक्रमक विधानानंतर मध्यपूर्वेतील तणाव मोठ्या प्रमाणावर वाढला आहे. दुसरीकडे इराणकडूनही प्रत्युत्तरात्मक कारवाईच्या बातम्या येत आहेत. या संघर्षाकडे संपूर्ण जगाचे लक्ष लागले आहे.
— डोनाल्ड जे. ट्रम्प (@realDonaldTrump) 28 फेब्रुवारी 2026
Comments are closed.