पश्चिम बंगाल आता 'भाजपशासित' आहे.

► वृत्तसंस्था/ कोलकाता

पश्चिम बंगालच्या राजकारणात 9 मे, 2026 हा दिवस आता सुवर्ण अक्षरांनी कोरला गेला आहे. सुवेंदू अधिकारी यांनी राज्याच्या मुख्यमंत्रीपदाची शपथ घेऊन एका नव्या युगाची सुरुवात केली आहे. बंगालचे राज्यपाल आर. एन. रवी यांनी सुवेंदू अधिकारी आणि इतर पाच आमदारांना मंत्रीपदाची शपथ दिली. तृणमूल काँग्रेसच्या पंधरा वर्षांच्या राजवटीचा अधिकृतपणे अंत झाला असून, भारतीय जनता पक्षाने राज्यात प्रथमच सत्तेची सूत्रे हाती घेतली आहेत. या ऐतिहासिक क्षणाचे साक्षीदार होण्यासाठी केवळ बंगालच नव्हे, तर संपूर्ण देशाच्या नजरा कोलकाता येथील ब्रिगेड परेड मैदानावर आयोजित शपथविधी कार्यक्रमावर खिळल्या होत्या.

सुवेंदू अधिकारी शनिवारी पश्चिम बंगालमधील भाजपचे पहिले मुख्यमंत्री बनले. पहिल्यांदाच पश्चिम बंगाल हे राज्य ‘भाजपशासित’ झाल्याने शपथविधी सोहळा भव्यदिव्य करण्यात आला. सुवेंदू अधिकारी यांनी बंगाली भाषेत देवाच्या नावाने शपथ घेतली. शपथविधीनंतर सर्वप्रथम सुवेंदू यांनी पंतप्रधानांकडे जात त्यांना वंदन केले. बंगालचे राज्यपाल आर. एन. रवी यांनी शपथ दिलेल्या नेत्यांमध्ये दिलीप घोष, अग्निमित्र पॉल, अशोक कीर्तनिय, खुदीराम टुडू आणि निशिथ प्रमाणिक यांचा समावेश होता. या शपथविधी सोहळ्याला पंतप्रधान मोदी, गृहमंत्री अमित शाह आणि एनडीए व भाजपशासित राज्यांचे 20 मुख्यमंत्री उपस्थित होते. पंतप्रधानांसोबत पक्षाचे राष्ट्रीय अध्यक्ष नितीन नवीन, संरक्षणमंत्री राजनाथ सिंह आणि केंद्रीय मंत्री धर्मेंद्र प्रधान हेसुद्धा या ऐतिहासिक शपथविधी सोहळ्याचे साक्षीदार झाले. देशभरातील प्रमुख नेत्यांच्या मंचावरील उपस्थितीने भाजपच्या विजयाचे महत्त्व अधिकच वाढवले. मोदींनी रवींद्रनाथ टागोर यांच्या जयंतीनिमित्त त्यांना अभिवादन करत सोहळ्याची सुरुवात केली.

समर्थकांचा प्रचंड जनसमुदाय

या विशेष शपथविधी सोहळ्यासाठी भाजपने मोठी तयारी केली होती. समर्थकांची प्रचंड गर्दी लक्षात घेऊन, दूरदूरच्या भागांतील लोकांना हा ऐतिहासिक क्षण जवळून पाहता यावा यासाठी मैदानावर 50,000 हून अधिक खुर्च्या मांडण्यात आल्या होत्या. उपस्थित लोकांच्या उत्साहावरून येथील जनता अनेक दशकांपासून या मोठ्या राजकीय बदलाची वाट पाहत होती, असे निदर्शनास येत होते. सकाळपासूनच समर्थकांचे घोळके उत्साहाने मैदानाकडे जाताना दिसत होते.

सुवेंदू अधिकारी यांच्या नावाचा जयघोष

सुवेंदू अधिकारी यांची मुख्यमंत्री म्हणून निवड हा बंगालच्या राजकारणातील एक मोठा आणि निर्णायक टप्पा मानला जात आहे. बंगालमधील भाजप समर्थकांसाठी पहिल्यांदाच राज्याच्या सरकारची सूत्रे तळागाळाच्या पातळीवर आपली ताकद वारंवार सिद्ध करणाऱ्या नेत्याच्या हाती आली आहे. सुवेंदू अधिकारी यांनी पद आणि गोपनीयतेची शपथ घेतली, तेव्हा संपूर्ण परेड मैदान घोषणा आणि टाळ्यांच्या कडकडाटाने दुमदुमले. हा भव्य कार्यक्रम यशस्वी व्हावा यासाठी भाजपने मान्यवरांना जवळपास 1,000 व्हीव्हीआयपी कार्ड आणि 9,000 निमंत्रण पत्रिका पाठवल्या होत्या.

कडेकोट सुरक्षा व्यवस्था

कार्यक्रम सुरक्षित आणि शांततेत पार पडावा यासाठी प्रशासनाने प्रत्येक ठिकाणी कडक सुरक्षा व्यवस्था तैनात केली होती. या विस्तृत सुरक्षा व्यवस्थेचा एक भाग म्हणून मैदानाच्या आणि आजूबाजूच्या संवेदनशील भागांमध्ये जवळपास 4,000 पोलीस कर्मचारी तैनात करण्यात आले होते. कोणताही अनुचित प्रकार घडू नये यासाठी प्रशासनाने सुरक्षेच्या प्रत्येक पैलूवर बारकाईने लक्ष ठेवले होते.

ब्रिगेड परेड ग्राऊंड भगव्या रंगाने उजळले!

पंतप्रधान नरेंद्र मोदी पश्चिम बंगालमधील शपथविधी सोहळ्याला उपस्थित राहण्यासाठी कोलकाता येथे दाखल झाले. ब्रिगेड परेड ग्राऊंडवर आयोजित शपथविधी सोहळ्यात पोहोचल्यावर त्यांनी सुवेंदू अधिकारी आणि प्रदेशाध्यक्ष सामिक भट्टाचार्य यांच्यासह एका खुल्या जीपमधून जनतेला अभिवादन केले. संपूर्ण ब्रिगेड परेड ग्राऊंड भगव्या रंगाच्या रोषणाईने उजळले होते.