भारत आणि पाकिस्तानमधील वाढत्या लष्करी तणावाच्या पार्श्वभूमीवर बीसीसीआयने इंडियन प्रीमियर लीग (IPL) 2025 अनिश्चित काळासाठी स्थगित करण्याचा निर्णय घेतला आहे. शुक्रवारी झालेल्या आपत्कालीन बैठकीत हा निर्णय घेण्यात आला. गुरुवारी धर्मशाळेत पंजाब किंग्ज आणि दिल्ली कॅपिटल्स यांच्यातील सुरू असलेला सामना पाकिस्तानने केलेल्या हवाई आणि ड्रोन हल्ल्यांमुळे 10.1 षटकांनंतर थांबवावा लागला. या हल्ल्यांमुळे जम्मू, पठाणकोट आणि उधमपूरमध्ये ब्लॅकआउट झाले. हे तिन्ही भाग धर्मशाळेजवळ आहेत. त्यानंतर स्पर्धेबाबत अनिश्चितता वाढली. स्थगितीमुळे आयपीएल 2025 चे 16 सामने शिल्लक राहिले, ज्यात 12 लीग सामने आणि चार प्लेऑफ सामने समाविष्ट आहेत.
देशाच्या पाठीशी उभे राहण्यासाठी, बीसीसीआयने आयपीएल 2025 तात्काळ रद्द करण्याचा निर्णय घेतला आहे. तो पुन्हा कधी सुरू होईल हे अद्याप स्पष्ट झालेले नाही. धर्मशाळा सामना रद्द झाल्यानंतर, लीगमध्ये सहभागी असलेल्या अनेक परदेशी खेळाडूंनी त्यांच्या सुरक्षेबद्दल चिंता व्यक्त केली. पहलगाममधील दहशतवादी हल्ल्यात 26 जणांचा मृत्यू झाल्यानंतर, भारताने पाकिस्तान आणि पाकव्याप्त काश्मीर (POK) मधील 9 प्रमुख दहशतवादी ठिकाणांना लक्ष्य करून अचूक हल्ले केले. याला प्रत्युत्तर म्हणून पाकिस्तानने 7-8 मे रोजी उत्तर आणि पश्चिम भारतातील काही लष्करी तळांना लक्ष्य करण्याचा प्रयत्न केला, ज्याला भारतीय सैन्याने योग्य आणि प्रभावी प्रत्युत्तर दिले.
शेवटचे आयपीएल 2011 मध्ये कोविड-19 महामारीमुळे स्थगित करण्यात आले होते. अनेक बायो-बबल उल्लंघन आणि खेळाडू आणि कर्मचाऱ्यांमध्ये वाढत्या कोविड प्रकरणांमुळे मंगळवार 4 मे 2021 रोजी आयपीएल 2021 स्थगित करण्यात आले. आयपीएल 2021 मध्ये फक्त 29 लीग सामने खेळले गेले. आयपीएल 2021 19 सप्टेंबर 2021 रोजी दुबईमध्ये मुंबई इंडियन्स आणि चेन्नई सुपर किंग्ज यांच्यातील सामन्याने पुन्हा सुरू करण्यात आला. दुबईमध्ये 13, शारजाहमध्ये 10 आणि अबू धाबीमध्ये आठ सामने खेळले गेले. आयपीएल 2021 अखेर 15 ऑक्टोबर 2021 रोजी संपला, चेन्नईने अंतिम सामन्यात कोलकाता नाईट रायडर्सचा पराभव केला.
Comments are closed.