दिल्ली कॅपिटल्स दिल्ली कॅपिटल्स आणि चेन्नई सुपर किंग्ज यांच्यात आज आयपीएल 2026 मधील अत्यंत महत्त्वाचा सामना रंगणार आहे. हा सामना दिल्लीतील अरुण जेटली स्टेडियमवर सायंकाळी 7.30 वाजता खेळवला जाणार असून, 7 वाजता नाणेफेक होईल. दोन्ही संघ सध्या गुणतालिकेत मधल्या स्थानी आहेत, त्यामुळे आजचा निकाल प्लेऑफच्या दृष्टीने निर्णायक ठरू शकतो.
दिल्ली कॅपिटल्स आणि चेन्नई सुपर किंग्ज यांनी आतापर्यंत 9 सामने खेळले असून प्रत्येकी 4 विजय आणि 5 पराभवांसह दोघांकडे 8 गुण आहेत. चांगल्या नेट रनरेटमुळे चेन्नई सहाव्या स्थानावर आहे, तर दिल्ली सातव्या क्रमांकावर आहे. आजचा सामना दिल्लीच्या होम ग्राउंडवर होत असल्याने दिल्लीला थोडा फायदा मिळू शकतो.
दोन्ही संघांमधील एकूण 32 सामन्यांपैकी चेन्नईने 20 सामने जिंकले आहेत, तर दिल्लीने 12 विजय मिळवले आहेत. विशेष म्हणजे, दिल्लीमध्ये खेळलेल्या शेवटच्या 8 सामन्यांपैकी 6 वेळा चेन्नईने बाजी मारली आहे. मागील सामन्यात चेन्नईने मुंबई इंडियन्सवर विजय मिळवला असल्याने त्यांचा आत्मविश्वास उंचावलेला आहे.
संजू सॅमसन सध्या उत्कृष्ट फॉर्ममध्ये आहे, तर कर्णधार ऋतुराज गायकवाडनेही फलंदाजीत दमदार कामगिरी सुरू केली आहे. वेगवान गोलंदाज अंशुल कंबोज पर्पल कॅपच्या शर्यतीत असून सातत्याने प्रभावी गोलंदाजी करत आहे.
दिल्ली कॅपिटल्ससाठी केएल राहुल मोठा प्लस पॉइंट ठरत आहे. तो 400+ धावा करून ऑरेंज कॅपच्या शर्यतीत आहे. तसेच मिचेल स्टार्कच्या पुनरागमनामुळे गोलंदाजीला बळ मिळाले असून, त्याने मागील सामन्यात 3 विकेट घेतल्या होत्या.
दिल्लीची पिच फलंदाजांसाठी अनुकूल मानली जाते. सपाट विकेट आणि छोट्या बाउंड्रीमुळे मोठा स्कोअर होण्याची शक्यता आहे. संध्याकाळी दव पडत असल्याने नाणेफेक जिंकणारा संघ प्रथम गोलंदाजी करण्याचा निर्णय घेऊ शकतो.
आजचा सामना चुरशीचा होणार असला तरी चेन्नई सुपर किंग्जचे पारडे किंचित जड वाटते. मात्र, घरच्या मैदानावर दिल्ली कॅपिटल्सलाही कमी लेखता येणार नाही. त्यामुळे चाहत्यांना एक रोमांचक लढत पाहायला मिळण्याची शक्यता आहे.
Comments are closed.