द. आफ्रिकेविरुद्धच्या वनडे मालिकेसाठी रिषभ पंतला कर्णधारपद का देण्यात आले नाही? खरे कारण समोर आले!

नियमित कर्णधार शुबमन गिलच्या अनुपस्थितीत, दक्षिण आफ्रिकेविरुद्धच्या दुसऱ्या कसोटी सामन्यासाठी उपकर्णधार रिषभ पंतकडे कर्णधारपदाची जबाबदारी सोपवण्यात आली. कोलकाता कसोटीत मानेच्या दुखापतीमुळे गिलला रुग्णालयात जावे लागले. दुखापतीमुळे तो आता दक्षिण आफ्रिकेविरुद्धच्या एकदिवसीय मालिकेत खेळू शकणार नाही. त्याच्या अनुपस्थितीत केएल राहुलला एकदिवसीय संघाचा कर्णधार म्हणून नियुक्त करण्यात आले आहे. रिषभ पंत देखील एकदिवसीय कर्णधारपदाचा दावेदार होता, परंतु त्याला कर्णधारपद का देण्यात आले नाही याचे खरे कारण उघड झाले आहे.

दक्षिण आफ्रिकेविरुद्धची तीन सामन्यांची एकदिवसीय मालिका 30 नोव्हेंबरपासून सुरू होत आहे. पहिला सामना 30 नोव्हेंबर रोजी रांची येथे, दुसरा 3 डिसेंबर रोजी रायपूर येथे आणि तिसरा 6 डिसेंबर रोजी विशाखापट्टणम येथे खेळला जाईल. बीसीसीआयच्या निवड समितीने रविवारी या मालिकेसाठी भारतीय संघाची घोषणा केली. गिलच्या अनुपस्थितीत केएल राहुल संघाचे नेतृत्व करेल. गेल्या महिन्यात रोहित शर्माच्या जागी गिलला भारतीय एकदिवसीय संघाचा नवा कर्णधार म्हणून नियुक्त करण्यात आले. 2027 च्या एकदिवसीय विश्वचषकाला डोळ्यासमोर ठेवून त्याला कर्णधार म्हणून निवडण्यात आले होते, परंतु दुखापतीमुळे तो पुढील मालिकेतून बाहेर पडला.

ऑस्ट्रेलिया दौऱ्यावर एकदिवसीय संघाचा उप-कर्णधार असलेला श्रेयस अय्यर देखील दुखापतीमुळे बाहेर आहे. ऑस्ट्रेलियाविरुद्धच्या सामन्यात झेल घेताना त्याला गंभीर दुखापत झाली आणि त्याला ताबडतोब रुग्णालयात नेण्यात आले. गिल आणि अय्यर दोघांच्याही अनुपस्थितीत निवडकर्त्यांनी दक्षिण आफ्रिका मालिकेसाठी तात्पुरता कर्णधार निवडला.

वृत्तसंस्था अहवालानूसार, दक्षिण आफ्रिकेविरुद्धच्या एकदिवसीय मालिकेसाठी रिषभ पंत हा देखील कर्णधारपदाचा पर्याय होता. तो सध्या गुवाहाटी येथे दोन्ही देशांमधील सुरू असलेल्या कसोटी मालिकेतील दुसऱ्या आणि शेवटच्या सामन्यात भारताचे नेतृत्व करत आहे. सूत्रांनी सांगितले की पंतला कर्णधारपद देण्यात आले नाही कारण त्याने गेल्या एका वर्षात फक्त एकच एकदिवसीय सामना खेळला आहे. गेल्या वर्षी श्रीलंका दौऱ्यात तो शेवटचा एकदिवसीय सामना खेळताना दिसला होता. तो चॅम्पियन्स ट्रॉफीसाठी भारतीय संघाचा भाग होता, परंतु स्पर्धेतील कोणत्याही सामन्यात त्याला प्लेइंग इलेव्हनमध्ये स्थान मिळाले नाही.

एका सूत्राने पीटीआयला सांगितले की केएल राहुलची एकदिवसीय कर्णधार म्हणून नियुक्ती गिलच्या कर्णधारपदाच्या योजनांना कोणताही धोका निर्माण करत नाही. तो अंतरिम कर्णधार आहे. केएल राहुलने यापूर्वी 12 एकदिवसीय सामन्यांमध्ये भारताचे नेतृत्व केले आहे. जर केएल राहुलच्या जागी एखाद्या तरुण खेळाडूला कर्णधार म्हणून नियुक्त केले गेले असते, तर चांगल्या कामगिरीनंतर तो स्वाभाविकपणे नियमित कर्णधारपदाचा दावेदार मानला गेला असता.

आता प्रश्न असा आहे की गिल दक्षिण आफ्रिकेविरुद्धची टी-20 मालिका खेळू शकेल का. तो कधी तंदुरुस्त होईल? सूत्राने पीटीआयला सांगितले की, “निवडकर्त्यांना आशा आहे की शुबमन गिल त्याच्या मानेची दुखापतीतून बरा होईल आणि न्यूझीलंडविरुद्धच्या मालिकेसाठी (जानेवारी 2026 मध्ये तीन सामन्यांची एकदिवसीय मालिका) परतेल.” यावरून असे दिसून येते की दक्षिण आफ्रिकेविरुद्धच्या टी-20 मालिकेत गिलचा सहभागही संशयास्पद आहे.