केन विल्यमसन भारताविरुद्धची वनडे मालिका खेळू शकणार नाही? जाणून घ्या नेमकं कारण काय

न्यूझीलंडचा दिग्गज फलंदाज केन विल्यमसनने अद्याप आपल्या आंतरराष्ट्रीय भविष्याबाबत कोणताही ठोस निर्णय घेतलेला नाही. तो आता ‘सीरीज-बाय-सीरीज’ या तत्त्वावर आपली उपलब्धता तपासत राहणार आहे. 35 वर्षीय विल्यमसन आता न्यूझीलंड क्रिकेटच्या ‘सेंट्रल कॉन्ट्रॅक्ट’चा भाग नाही, तर त्याने ‘कॅज्युअल कॉन्ट्रॅक्ट’ स्वाक्षरी केला आहे. या करारामुळे विल्यमसन आणि बोर्ड मिळून हे ठरवतात की, तो कोणत्या द्विपक्षीय मालिका आणि आयसीसी स्पर्धांमध्ये खेळणार आहे.

इंग्लंडमध्ये प्रदीर्घ काळ राहिल्यानंतर, विल्यमसन झिम्बाब्वे आणि वेस्ट इंडिजविरुद्धच्या व्हाईट-बॉल मालिकांमध्ये खेळला नव्हता. त्यानंतर त्याने तीन सामन्यांच्या कसोटी मालिकेत पुनरागमन केले, जी मालिका न्यूझीलंडने 2-0 ने जिंकली. माउंट माउंगानुई येथे झालेल्या पत्रकार परिषदेत विल्यमसन म्हणाला,”हो, हे साधारणपणे प्रत्येक मालिकेनुसार ठरेल. मी म्हटल्याप्रमाणे, या मालिकेनंतर संघासाठी मोठा ब्रेक आहे आणि त्यादरम्यान पुन्हा चर्चा होईल. त्यामुळे, कौटुंबिक जबाबदाऱ्या आणि खेळाचा समतोल राखत, येणाऱ्या परिस्थितीनुसार आम्ही निर्णय घेऊ.”

या वर्षाच्या सुरुवातीला विल्यमसनने टी20 आंतरराष्ट्रीय (T20I) क्रिकेटमधून निवृत्ती जाहीर केली होती, ज्यामुळे आगामी टी20 वर्ल्ड कपच्या शर्यतीतून तो बाहेर पडला आहे. येत्या वर्ल्ड कपपूर्वी न्यूझीलंडचा संघ जानेवारी महिन्यात मर्यादित षटकांच्या मालिकेसाठी भारत दौऱ्यावर येणार आहे. मात्र, अशा चर्चा रंगत आहेत की विल्यमसन कदाचित या दौऱ्यातील वनडे मालिका खेळणार नाही.

विल्यमसन म्हणाला, ‘माझी परिस्थिती अजूनही तशीच आहे. हा सर्व संतुलनाचा (Balance) भाग आहे. आता माझे एक छोटे कुटुंब आहे, ज्यासाठी मला खूप वेळ आणि लक्ष द्यावे लागते, पण मी अजूनही क्रिकेटचा आनंद घेत आहे. जोपर्यंत हे असेच राहील, तोपर्यंत न्यूझीलंड क्रिकेटने यामध्ये मोठी मदत केली आहे आणि त्याचा आदर केला आहे.’ विल्यमसनची पुढची जबाबदारी SA20 लीगमध्ये डर्बन सुपर जायंट्स (DSG) सोबत असेल, ज्यासाठी तो (23 डिसेंबर) रोजी रवाना होणार आहे. हेच मुख्य कारण आहे की तो कदाचित भारतातील वनडे मालिकेत खेळू शकणार नाही.