IPL 2026: आयपीएल जिंकणं टी-20 वर्ल्ड कपपेक्षाही कठीण; ‘या’ दोन कर्णधारांनी आंतरराष्ट्रीय टी-20 न खेळताही रचला इतिहास!

क्रिकेटमधील अनेक दिग्गजांचे असे मानणे आहे की, आयपीएल जिंकणे आता आयसीसी टी-20 वर्ल्ड कप जिंकण्यापेक्षाही जास्त कठीण झाले आहे. या लीगमध्ये मोठ्या खेळाडूंचे वर्चस्व पाहायला मिळते आणि फ्रँचायझी सहसा सुपरस्टार खेळाडूंवरच कर्णधारपदाची जबाबदारी सोपवतात. मात्र, आयपीएलच्या इतिहासात असे दोन यशस्वी कर्णधार होऊन गेले आहेत, ज्यांनी आपल्या देशासाठी एकही आंतरराष्ट्रीय टी-20 सामना खेळलेला नाही. त्यांच्या या यशाने सर्वांनाच थक्क केले आहे.

रजत पाटीदार
रॉयल चॅलेंजर्स बंगळुरू (RCB) संघ गेल्या 17 वर्षांपासून आयपीएल ट्रॉफीची वाट पाहत होता. आयपीएल 2025 मध्ये आरसीबीने रजत पाटीदारला (Rajat Patidar) आपला कर्णधार बनवले आणि पाटीदारने फ्रँचायझीची अनेक वर्षांची प्रतीक्षा संपवून विजेतेपद मिळवून दिले. रजत पाटीदार आज एक आयपीएल विजेता कर्णधार आहे, पण विशेष म्हणजे त्याने भारतासाठी आतापर्यंत एकही आंतरराष्ट्रीय टी-20 सामना खेळलेला नाही. पाटीदारने टीम इंडियासाठी 3 कसोटी आणि 1 वनडे सामना खेळला आहे, परंतु त्यात समाधानकारक कामगिरी न झाल्यामुळे सध्या तो भारतीय संघाचा भाग नाही.

आयपीएल 2026 मध्ये चांगली कामगिरी करून तो भारतीय टी-20 संघात स्थान मिळवण्याचा प्रयत्न करेल. पाटीदारकडे अजूनही आंतरराष्ट्रीय टी-20 पदार्पण करण्याची संधी आहे.

शेन वॉर्न
आयपीएलची सुरुवात 2008 मध्ये झाली. त्या पहिल्याच हंगामात राजस्थान रॉयल्सने ऑस्ट्रेलियाचे दिग्गज फिरकीपटू शेन वॉर्न (Shane Warne) यांच्याकडे कर्णधारपद सोपवले होते. वॉर्नने आपल्या कल्पक नेतृत्वाच्या जोरावर राजस्थानला आयपीएलचा पहिला विजेता बनवले. आश्चर्य म्हणजे शेन वॉर्न ऑस्ट्रेलियासाठी एकही आंतरराष्ट्रीय टी-20 सामना खेळले नव्हते. त्यांनी ऑस्ट्रेलियासाठी 145 कसोटी आणि 194 वनडे सामने खेळले असून त्यात 1001 विकेट्स घेतल्या होत्या. शेन वॉर्न हे क्रिकेट विश्वातील खूप मोठे नाव होते, पण टी-20 फॉरमॅटमध्ये त्यांना आंतरराष्ट्रीय अनुभवाशिवाय हे मोठे यश मिळाले.