गणेशोत्सव म्हटलं की बाप्पाची आरती, प्रसाद आणि अर्थातच मोदक-मिठाई आलीच. नेहमीपेक्षा या दिवसांत गोड पदार्थांचं सेवन वाढतं. भक्ती आणि उत्साहात एक-दोन मोदक जास्त खाल्ले जातात आणि त्यासोबत लाडू, पेढे, श्रीखंड यांचीही मेजवानी सुरू असते. गोड पदार्थ पूर्णपणे टाळण्याची गरज नसली, तरी प्रमाण आणि वेळेची काळजी घेतली तर वजन आणि रक्तातील साखरेवर अनावश्यक परिणाम होण्याचा धोका कमी करता येतो.
मोदक खा, पण प्रमाणात
मोदक हा गणेशोत्सवातील सगळ्यांचाच आवडता पदार्थ . त्यामुळे तो पूर्णपणे टाळणं अशक्य आहे पण एकावेळी किती खायचा, यावर नियंत्रण ठेवा. सलग अनेक मोदक खाण्याऐवजी छोट्या प्रमाणात आस्वाद घ्या.
वारंवार खाणं टाळा
सकाळपासून रात्रीपर्यंत प्रत्येक वेळी प्रसाद किंवा मिठाई खाणं टाळा. दिवसभरात गोड पदार्थ किती वेळा खाल्ले जात आहेत, याकडे लक्ष द्या.
जेवणानंतर गोड नको
पोट आधीच भरलेलं असताना त्यावर पुन्हा मोठ्या प्रमाणात गोड खाल्ल्यास एकूण कॅलरी वाढू शकतात. त्यामुळे गोड पदार्थाचं प्रमाण नियंत्रित ठेवणं महत्त्वाचं आहे.
घरगुती पदार्थांना प्राधान्य
शक्य असल्यास घरच्या घरी तयार केलेले मोदक किंवा इतर पदार्थ निवडा. त्यात साखर, तूप आणि इतर घटक किती वापरायचे, यावर नियंत्रण ठेवता येतं. मात्र घरगुती पदार्थही जास्त प्रमाणात खाल्ल्यास अतिरिक्त कॅलरी मिळू शकतात.
फळं / पौष्टिक पदार्थ
गणेशोत्सवाच्या काळात फक्त गोड पदार्थांवर भर न देता फळं, भाज्या, डाळी, कडधान्यं, दही आणि इतर पौष्टिक पदार्थ आहारात ठेवा. यामुळे आहारात विविधता राहते.
हालचाल करा
सणाच्या दिवसांत दिनक्रम बदलला तरी चालणं, घरातील कामं किंवा हलका व्यायाम यासाठी वेळ काढा.
मधुमेह असल्यास…
मधुमेह असणाऱ्यांनी गोड पदार्थांचं प्रमाण डॉक्टर किंवा आहारतज्ज्ञांनी सांगितलेल्या आहारानुसार ठेवावं. ‘साखर नसलेली’ किंवा ‘नैसर्गिक गोड’ अशी लेबल असलेली मिठाईही प्रमाणात खाणं योग्य
गणेशोत्सवाचा आनंद घेताना मोदक किंवा मिठाई पूर्णपणे टाळण्याची गरज नाही. प्रमाणात खा, संतुलित आहार घ्या आणि रोजच्या हालचाली कायम ठेवा. अशा प्रकारे बाप्पाच्या प्रसादाचा आनंद घेत आरोग्याचीही काळजी घेता येईल.
Comments are closed.