दुपारचे जेवण झाल्यानंतर अनेकांना लगेच झोपावेसे वाटते. विशेषतः पोटभर जेवण केल्यानंतर डोळ्यांवर झोप येते आणि थोडा वेळ आडवे व्हावेसे वाटते. ऑफिसमध्ये काम करणारे असोत किंवा घरी आराम करणारे, अनेकजण जेवल्यानंतर लगेच झोपण्याची सवय लावून घेतात. पण ही सवय आरोग्यासाठी योग्य आहे का? जेवल्यानंतर किती वेळाने झोपावे आणि लगेच झोपल्यास कोणत्या समस्या उद्भवू शकतात, हे जाणून घेणे महत्त्वाचे आहे.
जेवल्यानंतर लगेच झोपणे
जेवल्यानंतर लगेच आडवे झाल्यास काही लोकांना छातीत जळजळ, आंबट ढेकर किंवा अॅसिड रिफ्लक्सचा त्रास होऊ शकतो. विशेषतः ज्यांना आधीपासून अॅसिडिटीचा त्रास आहे, त्यांनी जेवणानंतर लगेच झोपणे टाळावे.
किती वेळाने झोपावे?
दुपारचे जेवण झाल्यानंतर शक्यतो 2 ते 3 तासांनी आडवे होणे योग्य ठरते, विशेषतः अॅसिड रिफ्लक्सचा त्रास होत असल्यास. मात्र, प्रत्येक व्यक्तीची पचनक्रिया आणि आरोग्य वेगळे असते. थोडा वेळ विश्रांती घ्यायची असल्यास खुर्चीवर बसून आराम करणे हा चांगला पर्याय आहे.
जेवणाचे प्रमाण
दुपारी खूप जड किंवा जास्त प्रमाणात जेवल्यास सुस्ती जाणवू शकते. त्यामुळे आहारात भाजी, डाळी, प्रथिनांचे स्रोत आणि योग्य प्रमाणात धान्य यांचा समतोल ठेवा. पुरेसे पाणी प्या आणि जेवणानंतर लगेच अंथरुणावर जाण्याची सवय टाळा.
दुपारी जेवल्यानंतर झोप येणे सामान्य असले, तरी लगेच आडवे होण्याची सवय टाळणे चांगले. शक्य असल्यास थोडे चालावे, आरामात बसावे आणि झोपण्यापूर्वी पुरेसा वेळ द्यावा. विशेषतः अॅसिडिटीचा त्रास असल्यास जेवणानंतर 2 ते 3 तासांनी झोपण्याचा नियम पाळणे फायदेशीर ठरू शकते.
Comments are closed.