दिवसभर काम करूनही थकवा जाणवतो? नाश्त्याला पोहे, दुपारी पोळी-भाजी आणि रात्री भात-आमटी असं ठरलेलं जेवण अनेकांच्या घरात असतं. मात्र, रोजच्या आहारात प्रोटीनयुक्त पदार्थांचा पुरेसा समावेश होतोय का, याकडे अनेकदा दुर्लक्ष होतं. शरीरातील स्नायूंची देखभाल, ऊतींची दुरुस्ती आणि विविध शारीरिक कार्यांसाठी प्रोटीन महत्त्वाचं असतं. यासाठी महागडे सप्लिमेंट्स घेण्याची गरज नाही. रोजच्या जेवणात काही छोटे बदल करून प्रोटीनचं प्रमाण वाढवता येऊ शकतं.
प्रोटीन वाढवण्यासाठी फॉलो करा या टिप्स
नाश्त्यात बेसन किंवा मूग डाळ : सकाळी फक्त चहा-बिस्किटांऐवजी बेसनाचा चिल्ला, मूग डाळीचे धिरडे किंवा दही-पोहे खा. यामुळे नाश्त्यात प्रोटीनयुक्त पदार्थांचा समावेश होईल.
डाळी आणि कडधान्ये खा : दुपारच्या आणि रात्रीच्या जेवणात डाळ, उसळ, चणे, राजमा किंवा मटकी यांचा समावेश करा. हे प्रोटीनचे सहज उपलब्ध आणि परवडणारे स्रोत आहेत.
दही आणि दूध : दूध, दही आणि पनीर यांसारखे पदार्थ प्रोटीन मिळवण्यासाठी उपयुक्त ठरतात. जेवणासोबत दही किंवा नाश्त्यात दूध घेऊ शकता.
पोळी किंवा भातासोबत प्रोटीनयुक्त पदार्थ : फक्त पोळी-भाजी किंवा भात खाण्याऐवजी त्यासोबत डाळ, उसळ, दही किंवा पनीरचा पदार्थ घ्या. यामुळे जेवण अधिक संतुलित होईल.
स्नॅक्समध्ये योग्य पर्याय : भूक लागल्यावर चिप्स किंवा बिस्किटांऐवजी भाजलेले चणे, शेंगदाणे, दही किंवा उकडलेली अंडी (खात असल्यास) निवडा.
प्रोटीनची गरज प्रत्येक व्यक्तीचे वय, वजन, शारीरिक हालचाल आणि आरोग्य यानुसार बदलते. त्यामुळे रोजच्या जेवणात विविध प्रोटीनयुक्त पदार्थांचा समावेश करा. संतुलित आहार आणि नियमित शारीरिक हालचाली यांची जोड दिल्यास आरोग्याची काळजी घेणे अधिक सोपे होईल.
Comments are closed.