आठव्या वेतन आयोगाच्या अंमलबजावणीच्या प्रतीक्षेत असलेल्या देशातील लाखो केंद्रीय कर्मचारी आणि पेन्शनधारकांचे लक्ष आता केंद्र सरकारच्या पुढील घोषणेकडे लागले आहे. दिवाळीपूर्वी आठव्या वेतन आयोगाबाबत कोणतीही महत्त्वाची अधिसूचना निघणार का, पगारवाढीचा मार्ग मोकळा होणार का, मागील थकबाकी भरली जाणार का, याबाबत कर्मचाऱ्यांमध्ये उत्सुकता वाढत आहे. वाढती महागाई, घरखर्च, शिक्षण, आरोग्य आणि इतर दैनंदिन खर्च पाहता कर्मचाऱ्यांना पगारवाढीच्या मोठ्या अपेक्षा असतात. मात्र, पगारवाढ दिवाळीपूर्वी जाहीर होणार की थकबाकी खात्यात जमा होणार याबाबत अद्याप कोणतीही ठोस अधिकृत घोषणा करण्यात आलेली नाही.
केंद्र सरकारने 3 नोव्हेंबर 2025 रोजी आठव्या केंद्रीय वेतन आयोगाची स्थापना केली. न्यायमूर्ती रंजना प्रकाश देसाई यांना या आयोगाच्या अध्यक्षा करण्यात आल्या आहेत. आयोगाला आपल्या शिफारशी सादर करण्यासाठी त्याच्या स्थापनेपासून १८ महिन्यांचा कालावधी देण्यात आला आहे आणि त्यानुसार, अहवाल सादर करण्याची अंतिम मुदत मे २०२७ आहे. आयोगाच्या शिफारशींमध्ये केंद्रीय कर्मचाऱ्यांचे मूळ वेतन, महागाई भत्ता, घरभाडे भत्ता आणि इतर फायद्यांमध्ये बदल करणे अपेक्षित आहे. याशिवाय पेन्शनधारकांच्या पेन्शनमध्ये सुधारणा करण्याचा मुद्दाही महत्त्वाचा ठरणार आहे. आयोगाच्या शिफारशी आणि त्यावर सरकारचा अंतिम निर्णय झाल्यानंतरच प्रत्यक्ष पगारवाढीचे चित्र स्पष्ट होणार आहे.
आठव्या वेतन आयोगाबाबत सर्वाधिक चर्चेचा मुद्दा म्हणजे पगार ठरवण्यासाठी वापरण्यात येणारा फिटमेंट फॅक्टर. कर्मचाऱ्यांच्या सुधारित मूळ वेतनाचा हिशोब हा घटक किती ठरवला जातो यावर अवलंबून असेल. मात्र, फिटमेंट फॅक्टर काय असेल, किमान वेतन किती वाढेल आणि विविध वेतनश्रेणीतील कर्मचाऱ्यांना किती आर्थिक लाभ मिळणार याबाबत अद्याप कोणताही अंतिम निर्णय झालेला नाही. पगारवाढीचे वेगवेगळे आकडे सोशल मीडियावर आणि वेगवेगळ्या वृत्तमाध्यमांवर चर्चिले जात असले तरी त्यांना अधिकृत मान्यता मिळाली आहे, असे मानणे चुकीचे ठरेल. कर्मचाऱ्यांना प्रत्यक्षात किती वाढ मिळणार हे आयोगाच्या शिफारशी आणि केंद्र सरकारच्या निर्णयानंतरच स्पष्ट होणार आहे.
थकबाकीचा प्रश्नही कर्मचाऱ्यांसाठी विशेष चिंतेचा विषय आहे. आठव्या वेतन आयोगाच्या शिफारशी 1 जानेवारी 2026 पासून पूर्वलक्षी प्रभावाने लागू करण्याचा निर्णय घेतल्यास पात्र कर्मचाऱ्यांना त्यावेळची थकबाकी मिळण्याची शक्यता आहे. तथापि, अंमलबजावणीची प्रभावी तारीख, थकबाकीची गणना, देयकाचे वितरण आणि बदललेला पगार प्रत्यक्षात कधी मिळणार हे सर्व केंद्र सरकारच्या अंतिम निर्णयावर अवलंबून असेल. त्यामुळे दिवाळीपूर्वी अधिसूचना निघाली तरी पगारवाढ किंवा थकबाकी लगेचच खात्यावर जमा होईल, असे ठामपणे सांगता येत नाही. सध्या केंद्रीय कर्मचारी आणि पेन्शनधारक आठव्या वेतन आयोगाच्या पुढील प्रक्रियेची आणि केंद्र सरकारच्या अधिकृत घोषणेची वाट पाहत आहेत.
हेही वाचा-
तैवानमध्ये चंपी वादळाचा धोका; शाळा आणि कार्यालये बंद, शेकडो उड्डाणे रद्द.
Comments are closed.