मुंबईच्या संघात पुन्हा बदल; टी-20 विश्वचषकासाठी निवड झालेल्या दोन खेळाडूंची अचानक एन्ट्री, रोहि

मुंबई विजय हजारे करंडक संघ अपडेट: विजय हजारे ट्रॉफी 2025-26 मुंबईच्या संघात पुन्हा एकदा मोठा बदल पाहायला मिळत आहे. आगामी स्पर्धांच्या पार्श्वभूमीवर टी-20 विश्वचषकासाठी भारतीय संघात निवड झालेल्या दोन स्टार खेळाडूंनी अचानक मुंबई संघात एन्ट्री घेतली आहे. त्यामुळे संघाची ताकद वाढली आहे. भारतीय टी-20 संघाचा कर्णधार सूर्यकुमार यादव आणि स्फोटक अष्टपैलू शिवम दुबे हे दोघेही पुन्हा एकदा मुंबईकडून खेळताना दिसणार आहेत. या दोन्ही खेळाडूंनी मुंबई क्रिकेट असोसिएशनला (MCA) आपली उपलब्धता कळवली असून, आगामी सामन्यांसाठी त्यांचा समावेश करण्यात आला आहे.

बीसीसीआयचा कडक आदेश…

भारतीय क्रिकेट नियामक मंडळ (BCCI) आणि निवड समितीचे अध्यक्ष अजित आगरकर यांनी अलीकडेच स्पष्ट केले आहे की करारबद्ध सर्व खेळाडूंनी देशांतर्गत क्रिकेटला प्राधान्य द्यावे. आगरकरांच्या मते, आंतरराष्ट्रीय वेळापत्रकात संधी मिळाल्यास वरिष्ठ खेळाडूंनी आपल्या राज्य संघाकडून खेळले पाहिजे, जेणेकरून त्यांची लय कायम राहील आणि तरुण खेळाडूंना त्यांच्याकडून शिकण्याची संधी मिळेल. याच सूचनेनुसार दक्षिण आफ्रिकेविरुद्ध नुकत्याच झालेल्या टी-20 मालिकेत खेळलेल्या खेळाडूंना विजय हजारे ट्रॉफीत किमान दोन सामने खेळण्याचे निर्देश देण्यात आले आहेत.

सूर्यासाठी फॉर्म परत मिळवण्याची सुवर्णसंधी (Mumbai Vijay Hazare Trophy Squad Update Suryakumar Yadav)

सूर्यकुमार यादवसाठी हा घरगुती स्पर्धा फॉर्म परत मिळवण्याची उत्तम संधी ठरू शकते. दक्षिण आफ्रिकेविरुद्ध झालेल्या 4 सामन्यांच्या टी-20 मालिकेत सूर्या अपयशी ठरला होता. या मालिकेत त्याने केवळ 8.50 च्या सरासरीने फक्त 34 धावा केल्या. कर्णधार म्हणून त्याने स्वतःही आपण कठीण काळातून जात असल्याची कबुली दिली होती. अशा परिस्थितीत हिमाचल प्रदेश आणि पंजाबसारख्या मजबूत संघांविरुद्ध धावा करून आत्मविश्वास परत मिळवणे, आगामी आंतरराष्ट्रीय मालिकांसाठी त्याच्यासाठी अत्यंत महत्त्वाचे ठरणार आहे.

जयपूरमधून मुंबईच्या मोहिमेचा प्रारंभ

विजय हजारे ट्रॉफीत मुंबई संघ आपल्या मोहिमेची सुरुवात 24 डिसेंबर रोजी जयपूर येथे सिक्कीमविरुद्ध करणार आहे. त्यानंतर 26 डिसेंबरला उत्तराखंडविरुद्ध सामना होईल. संघाचे नेतृत्व अनुभवी शार्दुल ठाकूरकडे असून, भारतीय कसोटी आणि वनडे संघाचा कर्णधार रोहित शर्मा तसेच शार्दुल ठाकूर सोमवारपर्यंत जयपूरला पोहोचण्याची शक्यता आहे. तेथे ते सराव सत्रात सहभागी होतील. सुरुवातीच्या सामन्यांत या दिग्गज खेळाडूंची उपस्थिती तरुण खेळाडूंना नवा उत्साह देईल.

न्यूझीलंड मालिका आणि टी-20 विश्वचषक 2026कडे लक्ष

विजय हजारे ट्रॉफीतील हे सामने भारतीय खेळाडूंसाठी न्यूझीलंडविरुद्ध होणाऱ्या आगामी घरगुती मालिकेच्या तयारीचाही भाग आहेत. भारत आणि न्यूझीलंड यांच्यात 11 ते 18 जानेवारीदरम्यान तीन वनडे सामने होतील, त्यानंतर 21 ते 31 जानेवारीदरम्यान 5 टी-20 सामन्यांची मालिका खेळवली जाईल. या टी-20 मालिकेनंतर भारतीय संघाला सुमारे महिनाभर विश्रांती मिळेल आणि त्यानंतर थेट टी-20 विश्वचषक 2026च्या तयारीला सुरुवात होईल. त्यामुळे विजय हजारे ट्रॉफीतील कामगिरी निवडकर्त्यांच्या नजरेत भरण्यासाठी अत्यंत निर्णायक ठरणार आहे.

रोहित शर्मा 24 आणि 26 डिसेंबर रोजी जयपूरमध्ये खेळणार

माध्यमांच्या वृत्तानुसार, रोहित शर्मा जयपूरमध्ये खेळल्या जाणाऱ्या विजय हजारे ट्रॉफीच्या पहिल्या दोन सामन्यांसाठी उपलब्ध असेल. मुंबईचा पहिला सामना 24 डिसेंबर रोजी सिक्कीमविरुद्ध आणि दुसरा सामना 26 डिसेंबर रोजी उत्तराखंडविरुद्ध असेल. त्यानंतर रोहित जानेवारीमध्ये राष्ट्रीय संघात सामील होईल आणि न्यूझीलंडविरुद्ध एकदिवसीय आंतरराष्ट्रीय मालिका खेळेल.

हे ही वाचा –

U19 Asia Cup : वैभव सूर्यवंशी, आयुष म्हात्रेसह प्रशिक्षकांवरही कारवाई होणार?; पाकविरुद्ध फायनलमध्ये दारुण पराभव होताच BCCI अ‍ॅक्शन मोडवर!

आणखी वाचा