आव्हाडांचा निष्ठावान कार्यकर्ता अजितदादांच्या गळाला, नितीन देशमुखांचा राष्ट्रवादीत प्रवेश

मुंबई : राज्यात महापालिका निवडणुकींच्या (Maharashtra Municipal Corporation Election 2026) पार्श्वभूमीवर राजकीय वातावरण तापलं आहे. सत्ताधारी पक्षात सातत्याने पक्ष प्रवेश होताना दिसत आहेत. अशातच मुंबईत राष्ट्रवादी काँग्रेस शरद पवार पक्षाला मोठा धक्का बसला आहे. जितेंद्र आव्हाड यांचा निष्ठावान कार्यकर्ता नितीन देशमुख यांनी राष्ट्रवादी काँग्रेस पक्षात प्रवेश केला आहे. नितीन देशमुख यांची पत्नी प्रियांका देशमुख प्रभाग क्रमांक 124 मधून इच्छुक आहेत. शरद पवारांच्या राष्ट्रवादीकडून त्यांना तिकीट न मिळाल्याने नितीन देशमुख नाराज झाले होते.

राष्ट्रवादी काँग्रेस पक्षात प्रवेश करण्यासाठी शरद पवारांच्या राष्ट्रवादीच्या इच्छुक उमेदवारांची चढाओढ

महापालिका निवडणुकीसाठी राष्ट्रवादी काँग्रेस शरद पवार पक्षाकडून नितीन देशमुख यांच्या पत्नी प्रियांका देशमुख यांना तिकीट मिळाले नाही. त्यामुळं ते राष्ट्रवादी काँग्रेस अजित पवार यांच्या पक्षात दाखल झाले आहेत. आज सकाळपासून राष्ट्रवादी काँग्रेस पक्षात प्रवेश करण्यासाठी शरद पवारांच्या राष्ट्रवादीच्या इच्छुक उमेदवारांची चढाओढ आहे. महानगरपालिका निवडणुकांच्या पार्श्वभूमीवर मोठ्या प्रमाणात राजकीय घडामोडी घडत आहेत. सत्ताधारी पक्षात सातत्याने पक्ष प्रवेश होताना दिसत आहेत. एका बाजुला भाजप आणि शिवसेनेत पक्ष प्रवेश होत असताना दुसऱ्या बाजुला राष्ट्रवादी काँग्रेस अजित पवार यांच्या देखील पक्षात प्रवेश होत आहेत.

कोण आहेत नितीन देशमुख?

राष्ट्रवादी काँग्रेस शरदचंद्र पवार पक्षाचे नितीन देशमुख हे निष्ठावान कार्यकर्ते मानले जात होते. जितेंद्र आव्हाड यांचे ते अत्यंत विश्वासू सहकारी होते. घाटकोपरमधील स्थानिक राजकारणातही त्यांचा प्रभाव आहे. युवक राष्ट्रवादी काँग्रेसमध्ये देखील ते सक्रीय होते. प्रवक्तेपदाची जबाबदारी देखील त्यांच्याकडे होती. राष्ट्रीय युवक काँग्रेसच्या कार्याध्यक्षपदाची जबाबदारी त्यांच्याकडे होती. आक्रमक भाषेसाठी आणि जशाच्या तसे उत्तर देण्यासाठी देखील देशमुख प्रसिद्ध आहेत.

विधानभवनाच्या लॉबीत आमदार गोपीचंद पडळकरांच्या कार्यकर्त्यांकडून नितीन देशमुखांना झाली होती मारहाण

विधानभवनाच्या लॉबीत राष्ट्रवादी काँग्रेस शरद पवार गटाचे आमदार जितेंद्र आव्हाड (Jitendra Awhad) आणि भाजप आमदार गोपीचंद पडळकर (Gopichand Padalkar) यांच्या कार्यकर्त्यांमध्ये हाणामारी झाली होती. आव्हाड यांचे कार्यकर्ते नितीन देशमुख (Nitin Deshmukh) यांना मारहाण झाली होती. याप्रकरणी याप्रकरणी सर्जेराव बबन टकले (37) आणि नितीन हिंदुराव देशमुख (41) या दोघांवर गुन्हा दाखल करण्यात आला होता. पोलिसांनी या दोघांनाही अटक केली होती. त्यानंतर प्रत्येकी 25 हजार रुपयांच्या जातमूचलक्यावर दोघांची सुटका करण्यात आली आहे.

आणखी वाचा