नाशिकमध्ये मोठा घोटाळा उघड, गरिबांच्या घरांवर धनदांडग्या बिल्डरांकडून डल्ला; 49 प्रकरणांमध्ये

नाशिक मळा फसवणूक: नाशिकमध्ये म्हाडा घरांच्या कोट्याबाबत मोठा घोटाळा उघडकीस आल्याची धक्कादायक माहिती समोर आली आहे. काही बांधकाम व्यावसायिकांनी बनावट कागदपत्रे, खोट्या सही-शिक्क्यांचा वापर करून शासनाची फसवणूक केल्याचा आरोप आहे. या प्रकरणात तब्बल 49 प्रकरणांमध्ये सरकारवाडा पोलीस ठाण्यात गुन्हे दाखल करण्यात आले असून संपूर्ण प्रकरणाची चौकशी सुरू आहे.

नियमांनुसार कोणत्याही बांधकाम व्यावसायिकाने 4 हजार चौरस मीटरपेक्षा मोठ्या क्षेत्रावर गृहप्रकल्प उभारताना त्या प्रकल्पातील 20 टक्के घरांचा कोटा म्हाडासाठी राखीव ठेवणे बंधनकारक असते. या योजनेचा उद्देश आर्थिक दुर्बल घटकातील नागरिकांना परवडणाऱ्या दरात घर उपलब्ध करून देणे हा आहे. मात्र नाशिकमधील काही बांधकाम व्यावसायिकांनी हा नियम टाळण्यासाठी गृहप्रकल्पाचे क्षेत्रफळ मुद्दाम कमी दाखवले, तसेच बनावट कागदपत्रे आणि खोट्या सही-शिक्क्यांच्या माध्यमातून शासनाची दिशाभूल केल्याचे तपासात समोर आले आहे.

Nashik Mhada Fraud: 49 प्रकरणांमध्ये शासनाची फसवणूक झाल्याचे उघड

याशिवाय काही प्रकरणांमध्ये प्रकल्पातील पोटहिस्से 2013 पूर्वीचे असल्याचा आभास निर्माण करून शासनाला देय असलेले 20 टक्के फ्लॅट जमा करण्यात आले नसल्याचेही तपासात स्पष्ट झाले आहे. भूमी अभिलेख कार्यालयाने केलेल्या पडताळणीत एकूण 128 प्रकरणांची तपासणी करण्यात आली. त्यापैकी 49 प्रकरणांमध्ये शासनाची फसवणूक झाल्याचे उघड झाल्याने भूमी अभिलेख विभागाच्या तक्रारीवरून सरकारवाडा पोलीस ठाण्यात गुन्हा दाखल करण्यात आला आहे.

Nashik Mhada Fraud: कोणत्या मोठ्या बांधकाम व्यावसायिकांची नावे समोर येणार?

भूमी अभिलेख विभागाने दिलेल्या तक्रारीनुसार या प्रकरणात भूमी अभिलेख, महसूल विभाग आणि म्हाडा या तिन्ही विभागांची फसवणूक झाल्याचे नमूद करण्यात आले आहे. सर्व्हे क्रमांकानुसार स्वतंत्र गुन्हे दाखल करण्यात आले असून या घोटाळ्यामागे नेमके किती बांधकाम व्यावसायिक सहभागी आहेत, याची नावे अद्याप समोर आलेली नाहीत. दरम्यान, या संपूर्ण प्रकरणात शेकडो कोटी रुपयांची फसवणूक झाल्याचा प्राथमिक अंदाज व्यक्त करण्यात येत आहे. सध्या 49 प्रकरणांबाबत तपास सुरू असून यात शासकीय कार्यालयातील अधिकारी-कर्मचारीही सहभागी आहेत का, तसेच कोणत्या मोठ्या बांधकाम व्यावसायिकांची नावे समोर येणार याकडे सर्वांचे लक्ष लागले आहे.

इतर महत्त्वाच्या बातम्या

Nashik Crime News: खिडकीला दोर बांधून कोणी फास लावेल का? डॉ. मनीषा जेजुरकरांच्या बहिणीचा सवाल, निलेश जेजुरकरांशी अफेअर असणारी महिला डॉक्टर गोत्यात येणार

Nashik Crime News: निलेश जेजुरकरांकडून माझ्या बहिणीचा दोन वर्षांपासून छळ, हीन दर्जाची वागणूक, आम्ही समजावण्याचा प्रयत्न केला, पण…; डॉ. मनीषा जेजुरकरांच्या भावानं सगळंच सांगितलं

आणखी वाचा