नेटफ्लिक्सचे सह- संस्थापक रीड हेस्टिंग्ज यांची राजीनाम्याची घोषणा, कंपनीकडून माहिती जाहीर

ओव्हर-द-टॉप (OTT)उद्योगातील अग्रगण्य प्लॅटफॉर्म असलेल्या नेटफ्लिक्सचे सह-संस्थापक रीड हेस्टिंग्ज यांनी आपल्या राजीनाम्याची घोषणा केली आहे. सह-संस्थापक म्हणून त्यांचा कार्यकाळ पुढील महिन्यात संपत असून, त्यानंतर ते कंपनीच्या संचालक मंडळाचाही राजीनामा देणार आहेत. अशी माहिती कंपनीकडून देण्यात आलेली आहे. सह-संस्थापक राजीनाम्यानंतर लोककल्याणासाठी कार्यरत राहणार असल्याचे समजते. परंतु याबाबत अधिक कुठलीही अधिकृत माहिती मात्र समोर आलेली नाही. हेस्टिंग्ज यांनी २०२३ मध्ये सीईओ पदाचाही राजीनामा दिला होता, त्यानंतर या राजीनाम्याची दीर्घकाळ चर्चा सुरू होती.

आज तकने दिलेल्या वृत्तानुसार, जूनमध्ये होणाऱ्या वार्षिक सभेत आपला कार्यकाळ पूर्ण झाल्यावर रीड हेस्टिंग्ज नेटफ्लिक्स इंक.च्या संचालक मंडळातून राजीनामा देणार आहेत. हेस्टिंग्ज यांना २१व्या शतकातील महान उद्योजकांपैकी एक मानले जात असल्याने, त्यांच्या जाण्याने आता गुंतवणूकदारांमध्ये चलबिचल सुरू असल्याचे समजते.

नेटफ्लिक्सला डीव्हीडी-बाय-मेल सेवा म्हणून सुरू करण्यासाठी हेस्टिंग्ज यांनी सुरुवातीचे भांडवल पुरवले होते. त्यानंतर १९९९ मध्ये ते सह-संस्थापक मार्क रँडॉल्फ यांच्यानंतर मुख्य कार्यकारी अधिकारी बनले. त्यांनी ब्लॉकबस्टरसोबतच्या स्पर्धेतून कंपनीला मार्गदर्शन केले आणि व्हिडिओ स्ट्रीमिंगमधील तिच्या विस्तारात महत्त्वाची भूमिका बजावली.

हेस्टिंग्ज यांच्या नेतृत्वाखाली, नेटफ्लिक्सने जगभरातील १९० हून अधिक प्रदेशांमध्ये आपली स्ट्रीमिंग सेवा सुरू केली होती. त्यानंतर हॉलीवूड स्टुडिओंना मागे टाकून जगातील सर्वात मौल्यवान मनोरंजन कंपनी बनली. जानेवारी २०२३ मध्ये त्यांनी सीईओ पदाचा राजीनामा दिला आणि ही जबाबदारी सह-सीईओ टेड सारँडोस आणि ग्रेग पीटर्स यांच्याकडे सोपवली होती.
हेस्टिंग्ज यांनी एका निवेदनात म्हटले, “नेटफ्लिक्सने माझे आयुष्य अनेक प्रकारे बदलले आहे. ग्रेग आणि टेड यांचे विशेष आभार, ज्यांची नेटफ्लिक्सच्या महानतेप्रती असलेली वचनबद्धता इतकी दृढ आहे की, आता मी नवीन गोष्टींवर लक्ष केंद्रित करू शकेन.”