दिल्लीच्या विजयाने दिग्गज संघांची झोप उडाली, कुणाला 1 तर कुणाला 2 विजय हवेत; IPL प्लेऑफच्या शर्

आयपीएल प्लेऑफ पात्रता परिस्थिती मराठीत: आयपीएल (IPL) चा चालू हंगाम आता त्याच्या निर्णायक टप्प्यावर येऊन पोहोचला आहे. प्रत्येक सामन्यानंतर गुणतालिकेत मोठी उलथापालथ पाहायला मिळत आहे. नुकत्याच झालेल्या पंजाब किंग्स (PBKS) आणि दिल्ली कॅपिटल्स (DC) यांच्यातील अटीतटीच्या लढतीने प्लेऑफच्या शर्यतीत मोठी खळबळ उडवून दिली आहे. काही संघांचे स्थान जवळपास निश्चित झाले असले, तरी चौथ्या क्रमांकासाठी अजूनही काँटे की टक्कर पाहायला मिळत आहे.

RCB आणि SRH प्लेऑफच्या उंबरठ्यावर

सध्याच्या आकडेवारीनुसार, रॉयल चॅलेंजर्स बेंगळुरू (RCB) आणि सनरायझर्स हैदराबाद (SRH) हे दोन संघ प्लेऑफसाठी प्रबळ दावेदार मानले जात आहेत. आरसीबीने आपल्या सातत्यपूर्ण कामगिरीच्या जोरावर 95% शक्यता निर्माण केली आहे. त्यांना आता केवळ उरलेल्या 3 पैकी 1 सामना जिंकणे आवश्यक आहे. दुसरीकडे, पॅट कमिन्सच्या नेतृत्वाखालील हैदराबादचा संघ 94% शक्यतेसह दुसऱ्या स्थानी असून, त्यांनाही प्लेऑफचे तिकीट पक्के करण्यासाठी फक्त एका विजयाची प्रतीक्षा आहे.

गुजरात आणि पंजाबची स्थिती मजबूत

हार्दिक पांड्याच्या जाण्यानंतरही गुजरात टायटन्स (GT) ने आपला दबदबा कायम ठेवला आहे. 92% शक्यतेसह ते तिसऱ्या क्रमांकावर असून त्यांनाही 3 पैकी 1 विजय मिळवणे गरजेचे आहे. मात्र, खऱ्या अर्थाने लक्ष वेधले ते पंजाब किंग्सने (PBKS) आहे. पंजाबने 85% प्लेऑफची शक्यता निर्माण केली असून त्यांना पुढच्या 3 पैकी 2 सामने जिंकावे लागतील. पंजाबच्या सध्याच्या फॉर्ममुळे इतर संघांची धाकधूक वाढली आहे.

CSK आणि RR साठी धोक्याची घंटा?

विजेतेपदाचे प्रबळ दावेदार मानले जाणारे चेन्नई सुपर किंग्स (CSK) आणि राजस्थान रॉयल्स (RR) सध्या थोड्या अडचणीत दिसत आहेत. चेन्नईला प्लेऑफमध्ये पोहोचण्यासाठी 3 पैकी 2 सामने जिंकणे अनिवार्य आहे, त्यांची शक्यता सध्या 62% आहे. तर राजस्थान रॉयल्सची अवस्था 55% असून त्यांनाही तेवढेच विजय आवश्यक आहेत. एकाही पराभवामुळे या संघांच्या अडचणी वाढू शकतात.

दिल्ली आणि कोलकाता आशा अद्याप जिवंत

दिल्ली कॅपिटल्स (DC) साठी आता ‘करा किंवा मरा’ अशी स्थिती आहे. त्यांना त्यांचे दोन्ही सामने जिंकावे लागतील आणि सोबतच नेट रन रेटवर (NRR) अवलंबून राहावे लागेल. दिल्लीची शक्यता सध्या 28% आहे. तर कोलकाता नाईट रायडर्स (KKR) साठी रस्ता अत्यंत खडतर आहे. त्यांना त्यांचे सर्वच्या सर्व 4 सामने जिंकावे लागतील, तरीही त्यांची प्लेऑफची शक्यता केवळ 10% इतकीच उरली आहे.

मुंबई आणि लखनऊचा प्रवास संपला

पाच वेळा विजेतेपद मिळवणाऱ्या मुंबई इंडियन्स (MI) आणि लखनऊ सुपर जायंट्स (LSG) या संघांचे या हंगामातील आव्हान अधिकृतपणे संपुष्टात आले आहे. हे दोन्ही संघ स्पर्धेतून बाद (Eliminated) झाले असून त्यांचे गुणतालिकेतील स्थान आता केवळ औपचारिक उरले आहे. एकूणच, आयपीएलचा हा हंगाम क्रिकेट चाहत्यांसाठी अत्यंत रोमांचक ठरत आहे. येत्या काही दिवसांतील सामने ठरवतील की कोणता संघ ट्रॉफीवर आपले नाव कोरण्यासाठी अंतिम चारमध्ये स्थान मिळवेल.

हे ही वाचा –

PBKS vs DC IPL 2026 : दिल्लीची दबंगगिरी! पंजाबच्या किंग्सचा पराभवाचा चौकार, पॉइंट टेबलमध्ये टॉपच्या संघांचे धाबे दणादले

आणखी वाचा