महिला टी-२० वर्ल्ड कप २०२६ (ICC Women’s T20 World Cup 2026) ची सुरुवात १२ जून (शुक्रवार) पासून होत आहे. इंग्लंडच्या यजमानपदाखाली खेळवल्या जाणाऱ्या या स्पर्धेत १२ संघ सहभागी होणार आहेत. इंग्लंडमध्ये टी-२० विश्वचषक खेळवला जाण्याची ही दुसरी वेळ आहे. येथे तुम्हाला या स्पर्धेशी संबंधित सर्व माहिती मिळेल, ज्यामध्ये फॉरमॅटपासून ते पावसाच्या नियमांचाही समावेश आहे.
स्पर्धेत सहभागी होणाऱ्या १२ संघांची ६-६ च्या दोन ग्रुपमध्ये (गटात) विभागणी करण्यात आली आहे. ग्रुप स्टेजमध्ये सर्व संघ राउंड रॉबिन फॉरमॅटमध्ये (प्रत्येक संघ इतर सर्व संघांसोबत समान सामने खेळेल) खेळतील. दोन्ही ग्रुपमधील टॉप-२ संघ सेमीफायनलसाठी (उपांत्य फेरीसाठी) पात्र ठरतील.
१२ पैकी ११ संघ आधीही टी-२० वर्ल्ड कप खेळले आहेत, पण एक संघ पहिल्यांदाच या स्पर्धेचा भाग बनत आहे. हा संघ नेदरलँड्सचा महिला संघ आहे, जो पहिल्यांदाच टी-२० विश्वचषक खेळणार आहे. नेदरलँड्सने क्वालिफायरमध्ये चौथे स्थान मिळवून पात्रतेचा मान मिळवला होता.
या स्पर्धेत एकूण ३३ सामने खेळवले जातील. हे सामने ७ मैदानांवर पार पडतील. या मैदानांमध्ये- एजबेस्टन (बर्मिंगहॅम), ओल्ड ट्रॅफर्ड (मँचेस्टर), हेडिंग्ले (लीड्स), रोज बाऊल (साउदम्प्टन), ब्रिस्टल काउंटी ग्राउंड (ब्रिस्टल) आणि लॉर्ड्स (लंडन) व केनिंग्टन ओव्हल (लंडन) यांचा समावेश आहे.
ग्रुप स्टेजच्या सामन्यांसाठी कोणताही रिझर्व्ह डे (राखीव दिवस) ठेवण्यात आलेला नाही. पाऊस किंवा खराब हवामानामुळे जर ग्रुप स्टेजमधील एखाद्या सामन्यात अडथळा आला, तर निकाल काढण्यासाठी किमान ५-५ ओव्हर्सचा (षटकांचा) सामना होणे आवश्यक असेल. जर सामना रद्द झाला, तर दोन्ही संघांना प्रत्येकी १-१ पॉईंट (गुण) दिला जाईल.
सेमीफायनल आणि फायनल सामन्यांसाठी रिझर्व्ह डे ठेवण्यात आला आहे. याशिवाय बाद फेरीच्या (नॉकआउट) सामन्यांसाठी १२० मिनिटांचा अतिरिक्त वेळही ठेवण्यात आला आहे. पाऊस किंवा खराब हवामानामुळे सामन्यात अडथळा आल्यास, निकाल काढण्यासाठी दोन्ही संघांना किमान १०-१० ओव्हर्स खेळणे बंधनकारक असेल. जर सामना रद्द झाला, तर ग्रुप स्टेजच्या पॉईंट्स टेबलमध्ये (गुणतालिकेत) आघाडीवर असलेला संघ पुढे जाईल.
Comments are closed.