इंग्लंडच्या खेळाडूचा मोठा निर्णय! कसोटी संघातून वगळल्यानंतर रेड-बॉल क्रिकेटमधून घेतला ब्रेक; आता फक्त टी20 वर लक्ष

इंग्लंड क्रिकेट संघाचा स्टार फलंदाज जॅक क्रॉली सध्या अत्यंत खराब फॉर्मचा सामना करत आहे. दरम्यान, आपला खराब फॉर्म पाहता त्याने एक मोठे पाऊल उचलले आहे. त्याने केंट काउंटी क्लबच्या पुढील दोन काउंटी चॅम्पियनशिप सामन्यांमधून माघार घेण्याचा निर्णय घेतला आहे, ज्यामुळे त्याच्या फर्स्ट-क्लास (प्रथम श्रेणी) कारकिर्दीला सध्या तरी ब्रेक लागला आहे. त्याचा हा निर्णय अलीकडील खराब कामगिरी आणि इंग्लंडच्या कसोटी संघातून (टेस्ट टीम) बाहेर पडल्यानंतर आला आहे. न्यूझीलंडविरुद्धच्या पहिल्या दोन कसोटी सामन्यांसाठी त्याचा इंग्लंडच्या संघात समावेश करण्यात आलेला नाही.

​जॅक क्रॉली या काउंटी हंगामातील सुरुवातीच्या सहा सामन्यांमध्ये एकही अर्धशतक झळकावू शकलेला नाही. त्याने या हंगामात आतापर्यंत १२ डावांमध्ये अवघ्या २०.५४ च्या खराब सरासरीने केवळ २२६ धावा केल्या आहेत, ज्यामध्ये त्याची सर्वोच्च धावसंख्या फक्त ४४ धावांची राहिली आहे. त्याने या वर्षाच्या सुरुवातीला ऑस्ट्रेलियात ॲशेस मालिका खेळली होती आणि तिथे तो इंग्लंडसाठी तिसरा सर्वाधिक धावा करणारा खेळाडू होता, परंतु कामगिरीत सातत्य नसल्यामुळे त्याला संघातून बाहेरचा रस्ता दाखवण्यात आला आहे. इंग्लंड क्रिकेटचे मॅनेजिंग डायरेक्टर रॉब की यांनीही मान्य केले की, खराब कामगिरीमुळे क्रॉलीला संघातून बाहेर व्हावे लागले असून त्याच्या जागी डरहमच्या एमिलियो गे याचा कसोटी संघात समावेश करण्यात आला आहे.

​क्रॉलीच्या या निर्णयाबाबत केंट क्लबने एक निवेदन जारी करून सांगितले आहे की, हा निर्णय खेळाडू, कोचिंग स्टाफ आणि इंग्लंड अँड वेल्स क्रिकेट बोर्ड (ECB) यांच्यातील परस्पर चर्चेनंतर घेण्यात आला आहे. केंटने लिहिले की, हा ब्रेक क्रॉलीला मानसिक आणि शारीरिकदृष्ट्या रिचार्ज होण्यास मदत करेल, जेणेकरून तो उर्वरित हंगामात आपले सर्वोत्तम योगदान देऊ शकेल. सध्या त्याचे पूर्ण लक्ष व्हाईट-बॉल (मर्यादित षटकांचे) क्रिकेट आणि व्हिटॅलिटी टी-२० ब्लास्टवर असेल.

​एकीकडे रेड-बॉल क्रिकेटमध्ये क्रॉलीच्या बॅटमधून धावा निघत नसताना, दुसरीकडे टी-२० क्रिकेटमध्ये मात्र त्याचा फॉर्म काहीसा चांगला राहिला आहे. तिथे त्याने गेल्या महिन्यात ससेक्सविरुद्ध ४१ चेंडूत नाबाद ७५ धावांची मॅच-विनिंग (सामना जिंकवून देणारी) खेळी केली होती. मीडिया रिपोर्ट्सनुसार, ‘द हंड्रेड’ टूर्नामेंटच्या आगामी हंगामासाठी त्याला ‘सनरायझर्स लीड्स’चा कर्णधार बनवले जाऊ शकते. त्याचा सहकारी खेळाडू हॅरी ब्रूक ‘द हंड्रेड’मध्ये कोणत्याही दबावाशिवाय खेळू इच्छितो, त्यामुळे क्रॉलीकडे ही जबाबदारी सोपवली जाऊ शकते.