फिफा विश्वचषक 2026 चा अंतिम सामना 19 जुलै रोजी अर्जेंटिना आणि स्पेन यांच्यात होणार आहे. संपूर्ण स्पर्धेत दमदार कामगिरी करत दोन्ही संघांनी अंतिम फेरीत धडक मारली आहे. आता ते विजेतेपदासाठी आमनेसामने असतील. हा विश्वचषक अर्जेंटिनाचा कर्णधार लिओनेल मेस्सीसाठी विशेष ठरला आहे. त्याने संघाला अंतिम फेरीपर्यंत नेण्यात महत्त्वाची भूमिका बजावली असून या दरम्यान आठ गोल केले आहेत. या अंतिम सामन्यात मेस्सीकडे इतिहासात नोंदवले जातील असे अनेक मोठे विक्रम प्रस्थापित करण्याची संधी आहे.
दोनदा विश्वचषक जिंकणारा पहिला कर्णधार बनण्याची संधी
लिओनेल मेस्सीच्या नेतृत्वाखाली अर्जेंटिनाने 2022 चा फिफा विश्वचषक जिंकला होता. जर अर्जेंटिनाने यावर्षी पुन्हा विजेतेपद पटकावले, तर फुटबॉलच्या इतिहासात दोनदा विश्वचषक जिंकणारा पहिला कर्णधार होण्याचा मान मेस्सीला मिळू शकतो. याव्यतिरिक्त, तीन फिफा विश्वचषक स्पर्धांमध्ये संघाचे नेतृत्व करणारा पहिला खेळाडू बनण्याच्या मार्गावरही तो आहे.
एकाच स्पर्धेत विश्वचषक विजेत्या संघाकडून सर्वाधिक गोल करण्याचा विक्रम
ब्राझीलचा दिग्गज फुटबॉलपटू रोनाल्डो नाझारिओ याने 2002 च्या विश्वचषकात आठ गोल केले होते. संघाला विजेतेपद मिळवून देण्यात मदत केली होती. मेस्सीनेही 2026 च्या विश्वचषकात आतापर्यंत आठ गोल केले आहेत. जर त्याने अंतिम सामन्यात आणखी एक गोल केला आणि अर्जेंटिनाने विजेतेपद जिंकले, तर एकाच स्पर्धेत विश्वचषक विजेत्या संघातील खेळाडूने सर्वाधिक गोल करण्याचा विक्रम त्याच्या नावावर जमा होईल. सध्या मेस्सी ‘गोल्डन बूट’च्या शर्यतीत आघाडीवर आहे.
तिसऱ्यांदा ‘गोल्डन बॉल’ जिंकण्याची संधी
लिओनेल मेस्सीने 2014 आणि 2022 च्या विश्वचषकात ‘गोल्डन बॉल’ पुरस्कार जिंकला होता. हा सन्मान दोनदा मिळवणारा तो जगातील एकमेव खेळाडू आहे. जर त्याने अंतिम सामन्यात उत्कृष्ट कामगिरी केली आणि अर्जेंटिनाला विजयाकडे नेले, तर तो पुन्हा एकदा ‘गोल्डन बॉल’ जिंकू शकतो. असे झाल्यास, फिफा विश्वचषकाच्या इतिहासात तीनदा ‘गोल्डन बॉल’ जिंकणारा पहिला खेळाडू होण्याचा मान त्याला मिळेल.
सलग दोन विश्वचषक जिंकणारा सर्वात वयस्कर खेळाडू बनण्याची संधी
इटली आणि ब्राझीलनंतर सलग दोनदा फिफा विश्वचषक जिंकणारा तिसरा देश बनण्याची संधी अर्जेंटिनाकडे आहे. जर अर्जेंटिनाने स्पेनचा पराभव करून विजेतेपद पटकावले, तर लिओनेल मेस्सी सलग दोनदा विश्वचषक जिंकणारा सर्वात वयस्कर खेळाडू ठरेल. सध्या हा विक्रम ब्राझीलचे दिग्गज खेळाडू निलटन सँटोस यांच्या नावावर आहे. त्यांनी वयाच्या 37 व्या वर्षी, 1962 मध्ये आपल्या संघाला सलग दुसऱ्यांदा विश्वविजेते बनवण्यात मोलाची भूमिका बजावली होती.
Comments are closed.