कच्च्या तेलाच्या किमती पुन्हा उच्चांकाकडे जात आहेत

वृत्तसंस्था/नवी दिल्ली

आंतरराष्ट्रीय बाजारात कच्च्या तेलाच्या किमती पुन्हा एकदा सहा आठवड्यांच्या उच्चांकावर पोहोचल्या आहेत. सध्या ब्रेंट क्रूड 96 डॉलर आणि डब्ल्यूटीआय 88.27 डॉलर प्रतिबॅरल दराने विकले जात होते. कच्च्या तेलाच्या दरांमध्ये सध्या चढ-उतार होत असले तरी भारतात पेट्रोल आणि डिझेलच्या किमती स्थिर राहिल्या आहेत. कच्च्या तेलाच्या किमतीतील ही वाढ अमेरिकेने इराणवर केलेले हल्ले, हुथी बंडखोरांनी लाल समुद्रातील सागरी मार्गांवर केलेले हल्ले आणि वाढत्या जागतिक तणावामुळे झाली आहे. होर्मुझच्या सामुद्रधुनीजवळ झालेल्या स्फोटानंतर एका तेलवाहू जहाजाला आग लागल्याचे इराणच्या रिव्होल्यूशनरी गार्ड्सने कळवल्यानंतर जागतिक तेल पुरवठ्याबद्दलची चिंता आणखी वाढली. याव्यतिरिक्त हुथी बंडखोरांनी सौदी अरेबियाच्या नाकेबंदीची घोषणा केल्याचा परिणाम जागतिक अर्थव्यवस्थेवर होताना दिसत आहे.