जपानमधील ओकिनावामध्ये सौडेल चक्रीवादळामुळे हाहाकार; 150 विमान उड्डाणे रद्द, 30 हजार घरांचा वीजपुरवठा खंडित

जपानमधील ओकिनावासह नैऋत्य जपानच्या इतर बेटांवर चक्रीवादळाने हाहाकार माजवला. यानंतर सौडेल चक्रीवादळ बुधवारी पूर्व चीन समुद्रावरून पश्चिमेकडे सरकले. सोसाट्याचा वारा, मुसळधार पाऊस आणि वीजपुरवठा खंडित झाल्यामुळे जनजीवन विस्कळीत झाले आहे. अपघातांमध्ये दोन जण किरकोळ जखमी झाल्याचे अधिकाऱ्यांनी सांगितले.

जपान हवामान संस्थेनुसार, सौडेल चक्रीवादळ बुधवारी सकाळी उशिरा ओकिनावाच्या ओकिनेराबू बेटाच्या वायव्येस सुमारे 180 किलोमीटर अंतरावर होते. चक्रीवादळ पश्चिमेकडे सरकत असून ते पूर्व चीनच्या किनाऱ्यावर पोहोचण्याची शक्यता आहे.

वादळामुळे ओकिनावामधील नाहा विमानतळावरून येणारी आणि जाणारी सुमारे 150 उड्डाणे रद्द करण्यात आली. कागोशिमा प्रांतातील 30,000 हून अधिक घरांचा वीजपुरवठा विस्कळीत झाला. वादळामुळे अमामी प्रदेशासह अनेक भागांमध्ये वीजपुरवठा खंडित झाला.

मुसळधार पावसामुळे चिंता वाढली आहे. जेएमएच्या मते, अमामी प्रदेशात गेल्या 24 तासांत 23 सेंटीमीटरपेक्षा जास्त पावसाची नोंद झाली आहे. एजन्सीने गुरुवार दुपारपर्यंत अमामी प्रदेशात 10 सेंटीमीटर आणि ओकिनावामध्ये 12 सेंटीमीटर पावसाचा अंदाज वर्तवला आहे. सततच्या पावसामुळे, हवामान विभागाने अमामी प्रदेशात भूस्खलनाचा इशारा देखील दिला आहे.