भारत आणि वेस्ट इंडिज (IND vs WI) यांच्यात सुरू असलेल्या वनडे मालिकेतील दुसऱ्या सामन्यात वेस्ट इंडिजने मोठा विक्रम केला आहे. या सामन्यात वेस्ट इंडिजच्या तीन फलंदाजांनी शतके झळकावत इतिहास रचला. यासोबतच वेस्ट इंडिजने भारताविरुद्ध वनडेमध्ये आतापर्यंतची सर्वात मोठी धावसंख्याही उभारली आहे. गुवाहाटीमध्ये आज केलेली ही कामगिरी याआधी कधीही झाली नव्हती. तब्बल 43 वर्षे जुना विक्रम वेस्ट इंडिजने मोडला आहे.
भारताविरुद्ध वनडेमध्ये वेस्ट इंडिजची याआधीची सर्वोच्च धावसंख्या 333 धावांची होती. 7 डिसेंबर 1983 रोजी जमशेदपूरमध्ये झालेल्या सामन्यात वेस्ट इंडिजने 8 गडी गमावून 333 धावा केल्या होत्या. आता हा विक्रम मोडला आहे. तब्बल 43 वर्षांनंतर वेस्ट इंडिजने भारताविरुद्ध 333 पेक्षा अधिक धावा केल्या. 50 षटकांच्या या सामन्यात वेस्ट इंडिजने 42व्या षटकातच 333 धावांचा टप्पा पार केला.
या सामन्यातील विशेष बाब म्हणजे, वेस्ट इंडिजच्या तीन फलंदाजांनी शतके झळकावली. एकाच वनडे सामन्यात वेस्ट इंडिजच्या तीन फलंदाजांनी शतके करण्याची ही पहिलीच वेळ आहे.
सर्वप्रथम जॉन कॅम्पबेलने (John Campbell) 68 चेंडूंमध्ये 101 धावांची खेळी केली. त्यानंतर कर्णधार शाई होपनेही (Shai Hope) शतक झळकावले. शाई होपने 94 चेंडूंमध्ये 104 धावांची दमदार खेळी केली. त्यानंतर आमिर जांगूनेही (Amir jangu) शतक ठोकले. त्याने 77 चेंडूंमध्ये 114 धावा केल्या. वेस्ट इंडिजच्या 300 हून अधिक धावांमध्ये या तिन्ही फलंदाजांचा मोठा वाटा राहिला.
वनडे क्रिकेटच्या इतिहासात (ODI cricket) एखाद्या संघाच्या तीन फलंदाजांनी एकाच सामन्यात शतके झळकावण्याची ही सहावी वेळ आहे. वेस्ट इंडिजने अशी कामगिरी पहिल्यांदाच केली आहे. तसेच भारताविरुद्धही अशी कामगिरी पहिल्यांदाच पाहायला मिळाली. यापूर्वी 2023 मध्ये ऑस्ट्रेलियाच्या तीन फलंदाजांनी दक्षिण आफ्रिकेविरुद्ध एकाच सामन्यात शतके झळकावली होती. त्यानंतर आता पुन्हा एकदा अशी कामगिरी पाहायला मिळाली आहे.
Comments are closed.