सोशल मीडिया पाहून आम्ही संघ निवडत नाही, गौतम गंभीर यांनी वैभवच्या चाहत्यांना दिले सणसणीत उत्तर

वैभव सूर्यवंशीने आयपीएलमध्ये एकच धमाका केला होता; पण त्यानंतरही त्याला लगेच संघात स्थान देण्यात आले नाही. त्यामुळे संघाचे मुख्य प्रशिक्षक गौतम गंभीर यांच्यावर जोरदार टीका झाली होती. या विषयावर गंभीर यांनी आपले मत व्यक्त केले आहे. सोशल मीडियापासून आम्ही हिंदुस्थानचा संघ निवडत नाही, असे सणसणीत उत्तर गंभीर यांनी वैभवच्या चाहत्यांना दिले आहे.

हिंदुस्थानच्या क्रिकेटमध्ये प्रतिभेची कमतरता नाही, पण योग्य वेळी योग्य संधी मिळणे हेच खेळाडूचे भविष्य ठरवते असे म्हटले जाते. वयाच्या 15व्या वर्षी आंतरराष्ट्रीय स्तरावर पदार्पण करून इतिहास रचणारा वैभव सूर्यवंशी सध्या चर्चेत आहे. त्याच्याबाबत गंभीर यांनी भाष्य केले आणि त्याचा उत्कृष्ट फॉर्म असूनही या तरुण खेळाडूला संधीसाठी का थांबावे लागले हे स्पष्ट केले.

गंभीर यांनी यावेळी सांगितले की, ‘एखाद्या खेळाडूने केवळ चांगल्या फॉर्ममध्ये असण्याने संघात स्थान मिळण्याची हमी नसते. संघ व्यवस्थापनाचे दीर्घकाळ संघात असलेल्या अनुभवी खेळाडूंचे संरक्षण करणे हे सर्वोच्च प्राधान्य आहे. हा माझ्यासाठीही एक नवीन अनुभव होता. तो खूप चांगल्या फॉर्ममध्ये होता; पण मी त्याला समजावून सांगितले की, जे खेळाडू बऱ्याच काळापासून संघासाठी चांगली कामगिरी करत आहेत, त्यांच्यामुळे कधीकधी तुम्हाला तुमच्या संधीची वाट पाहावी लागते. आणि एक गोष्ट स्पष्ट आहे की, सोशल मीडिया किंवा बाहेरील चर्चा अंतिम 11 खेळाडू ठरवत नाहीत.’

वैभवची स्फोटक कामगिरी

या वर्षाच्या सुरुवातीला सर्वात कमी वयात पदार्पण करण्याचा विक्रम करून वैभवने सर्वांचे लक्ष वेधून घेतले होते. त्याने इंग्लंडविरुद्ध टी-20 पदार्पण करताना महान क्रिकेटपटू सचिन तेंडुलकरचा प्रदीर्घ काळापासूनचा विक्रम मोडला आणि नंतर झिम्बाब्वेविरुद्ध अर्धशतक झळकवून आंतरराष्ट्रीय क्रिकेटमध्ये अर्धशतक करणारा सर्वात तरुण फलंदाज बनला. पण अफगाणिस्तानविरुद्धच्या मालिकेत आणि आशिया कपच्या सुरुवातीच्या सामन्यांमध्ये त्याला अंतिम 11 खेळाडूंमधून वगळल्याने अनेक प्रश्न निर्माण झाले होते.

संजू किंवा अभिषेकला वगळणे कठीण

संजू सॅमसन आणि अभिषेक शर्मा यांसारख्या खेळाडूंची उदाहरणे देत गंभीर म्हणाले की, गेल्या दीड ते दोन वर्षांत प्रभाव पाडलेल्या खेळाडूंना तीन-चार अपयशांच्या आधारावर वगळता येणार नाही. जर वैभव आज खेळला तर ज्या खेळाडूला वगळायचे आहे, मग तो अभिषेक असो किंवा संजू, त्याच्यासोबत माझी एक कठीण चर्चा होईल. त्यामुळे गेल्या दीड-दोन वर्षांत इतका प्रभाव पाडलेल्या जोडीकडे आम्ही अचानक दुर्लक्ष करू शकत नाही. आम्हाला ड्रेसिंग रूममध्ये सुरक्षिततेची भावना निर्माण करायची आहे.

आशियाई क्रीडा स्पर्धेत आक्रमक सुरुवात

वैभवने संधी मिळाल्यावर पुन्हा एकदा स्वतःला सिद्ध केले. आशियाई क्रीडा स्पर्धेच्या उपांत्य फेरीत श्रीलंकेविरुद्ध पुनरागमन करताना त्याने 21 चेंडूंमध्ये 38 धावांची महत्त्वपूर्ण खेळी केली. त्यानंतर पाकिस्तानविरुद्धच्या अंतिम सामन्यात 9 चेंडूंमध्ये 15 धावा करून त्याने संघाच्या विजयात योगदान दिले.