दिवाळी म्हटलं की घराची सजावट, रोषणाई आणि आकर्षक कंदील यांची लगबग सुरू होते. बाजारातून महागडे कंदील खरेदी करण्याऐवजी यंदा घरच्या घरी कंदील तयार करून पाहा. रंगीबेरंगी कागद, जुन्या वस्तू आणि थोडी कल्पकता वापरून सुंदर कंदील तयार करता येतात. हे कंदील घराला आकर्षक लूक देण्यासोबतच दिवाळीच्या सजावटीत वैयक्तिक स्पर्शही आणतील.
1. रंगीबेरंगी पेपर कंदील
क्राफ्ट पेपर किंवा रंगीत कागद वापरून पारंपरिक गोलाकार किंवा चौकोनी कंदील तयार करा. कागदावर फुलं, पानं किंवा भूमितीय नक्षी काढून सजावट करा. वेगवेगळ्या रंगांचे कंदील एकत्र लावल्यास घराला उत्सवी लूक मिळेल.
2. जुन्या बांगड्यांपासून कंदील
घरात वापरात नसलेल्या रंगीबेरंगी बांगड्या एकत्र करून गोलाकार रचना तयार करा. त्यावर सजावटीचे धागे, मणी किंवा लेस लावून आकर्षक कंदील बनवता येईल. जुन्या वस्तूंचा पुनर्वापर करण्यासाठी हा उत्तम पर्याय आहे.
3. मिरर वर्क कंदील
साध्या कागदी किंवा कार्डबोर्डच्या कंदिलावर छोटे सजावटीचे मिरर, कुंदन आणि रंगीत स्टोन चिकटवा. सोनेरी, लाल किंवा गुलाबी रंगाच्या कंदिलांवर ही सजावट विशेष उठून दिसते.
4. फुलांचा मेणबत्ती
कागदी फुलं, कृत्रिम झेंडू किंवा कमळाच्या सजावटीचा वापर करून कंदील तयार करा. पारंपरिक आणि मॉडर्न सजावटीचा सुंदर मिलाफ या कंदिलांमध्ये पाहायला मिळेल.
5. साड्यांपासून कंदील
जुनी साडी किंवा कापड वापरून सुंदर आणि आकर्षक आकाशकंदील बनवता येतो. साडीच्या उरलेल्या कपड्यापासून किंवा लेसपासून लहान फुलांचे आकार किंवा गोंडे तयार करून कंदीलाच्या अतिरिक्त सजावटीसाठी वापरता येतात.
कंदील सजवताना लक्षात ठेवा
कागद, कपडे आणि इतर ज्वलनशील सजावटीच्या वस्तू प्रत्यक्ष ज्योतीपासून दूर ठेवा. कंदिलात रोषणाईसाठी LED फेरी लाइट्स वापरा. कंदील लटकवताना तो सुरक्षितपणे बांधलेला आहे का याची खातरी करा.
Comments are closed.