तिशीनंतर महिलांचे पोट सुटण्यास या सवयी ठरतात कारणीभूत

वयाची तिशी ओलांडल्यानंतर महिलांच्या शरीरात अनेक  बदल होण्यास सुरूवात होते. विशेषतः पोटाभोवतीची चरबी वाढण्याची समस्या अनेक महिलांना जाणवते. आहारात फारसा बदल नसतानाही वजन वाढते आणि पूर्वीप्रमाणे व्यायाम करूनही अपेक्षित परिणाम मिळत नाहीत. यामागे काही सवयी कारणीभूत असू शकतात. आजच्या लेखात आपण तिशीनंतर महिलांचे पोट सुटण्यास कोणत्या सवयी कारणीभूत ठरतात हे पाहूया

शरीरातील स्नायू कमी होणे

वय वाढू लागल्यानंतर शरीरातील स्नायूंचे प्रमाण हळूहळू कमी होऊ शकते. त्यामुळे शरीराची कॅलरी जाळण्याची क्षमता कमी होते आणि पोटाभोवती चरबी जमा होण्याची शक्यता वाढते.

हार्मोन्समध्ये बदल

वयानुसार हार्मोन्समध्ये बदल होतात. विशेषतः इस्ट्रोजेनच्या पातळीत होणारे बदल शरीरातील चरबी वाढवण्यास कारण ठरतात.

सततचा ताण

कामाचा ताण, कौटुंबिक जबाबदाऱ्या आणि अपुरी विश्रांती यामुळे शरीरातील कॉर्टिसोल या तणावाच्या हार्मोनवर परिणाम होऊ शकतो. ज्याचा परिणाम पोटाभोवती चरबी वाढण्यास कारण ठरतो.

अपुरी झोप

रात्री पुरेशी झोप न घेतल्यास भूक आणि खाण्याच्या इच्छेवर परिणाम होतो. त्यामुळे गोड पदार्थ किंवा जास्त कॅलरी असलेले पदार्थ खाण्याचे प्रमाण वाढू शकते.

शारीरिक हालचालींचा अभाव

दिवसभर एकाच जागी बसून काम करणे आणि व्यायामाकडे दुर्लक्ष करणे यामुळे वजन वाढण्याची शक्यता असते.

काय काळजी घ्यावी?

• पोटाची चरबी नियंत्रित ठेवण्यासाठी संतुलित आहार घ्या.
• आहारात प्रथिनांचा समावेश करा.
• नियमित चालणे, योगासने आणि स्नायू मजबूत करणारे व्यायाम करा.
• दररोज 7 ते 8 तासांची झोप घेण्याचा प्रयत्न करा.
• डाएट करण्याऐवजी आरोग्यदायी जीवनशैलीचा स्वीकार करा.
• वजन किंवा पोटाचा घेर अचानक वाढत असल्यास डॉक्टरांचा सल्ला घ्या.

हेही वाचा – फराळ खाऊन ठेवा वजन आणि शुगरवर कंट्रोल