पुण्यात दुचाकीवरील मृतदेहाचं गूढ उलगडलं! बापाची पैशाची मागणी, सूनेचा विरोध, कडाक्याचं भांडण अन्

पुणे: पुण्यात घरगुती वादातून पतीनेच आपल्या आठ वर्षाच्या मुलासमोरच आपल्या पत्नीचा गळा दाबून हत्या केल्याची माहिती समोर आली आहे. पत्नीला निर्घृणपणे संपवून मृतदेहाची विल्हेवाट लावण्यासाठी जाताना त्याला पोलिसांनी पकडलं. त्यावेळी त्याने उडवा उडवीची उत्तर दिली. मात्र,पोलिसांना संशय आला त्यांनी त्याला घेऊन त्याचं घर गाठलं. घरी त्याच्या आठ वर्षांच्या चिमुकल्याने आपल्या डोळ्यांनी आपल्या बापाने आपल्या आईला जीवे मारल्याची डोळ्यांनी पाहिलेली हकीकत सांगितली. ही मन हेलावून टाकणारी घटना पुण्यातील नांदेड सिटी जवळ ही घटना घडली आहे. या घटनेबाबत सविस्तर माहिती पुण्याचे पोलीस उपायुक्त संदीप सिंह गिल यांनी पत्रकार परिषदेत दिली आहे.

या संपूर्ण प्रकरणाचा घटनाक्रम सांगताना पोलीस उपायुक्त संदीप सिंह गिल म्हणाले की, ‘काल नांदेड सिटी पोलीस स्टेशनच्या हद्दीत ही घटना घडली आहे. लायगुडे मळा परिसरातील समृध्दी सोसायटीत हे जोडपं गेल्या दीड वर्षांपासून राहत होतं. आरोपी राकेशनं राहत्या घरात बबीताची हत्या केली. दोघेही मूळचे उत्तर प्रदेश येथील रहिवासी आहेत. दीड वर्षापासून ते पुण्यामध्ये राहायला आलेले होते. घटना घडली त्या दिवशी दोघांमध्ये घरगुती कारणावरून वाद झाला होता. सोमवारी रात्री आरोपी राकेशच्या वडिलांचा फोन आला होता. त्यांनी फोनवरून मुलगा राकेशकडे पैसे मागितले, मात्र, पत्नी बबीताने राकेशच्या वडिलांना पैसे देण्यासाठी नकार दिला. यावरून दोघांमध्ये वाद झाला. या नवरा-बायकोच्या वादानंतर बबिताने आत्महत्या करण्याचा प्रयत्न केला. मात्र तिचा प्रयत्न फसला. मात्र, यानंतर संतापलेल्या राकेशनं बबीताची हत्या केली.

नेमकं काय घडलं?

मिळालेल्या माहितीनुसार, राकेशने बबीताचा गळा दाबून तीचा जीव घेतला. त्यानंतर पत्नीचा मृतदेह कापडात गुंडाळला आणि विल्हेवाट लावण्यासाठी दुचाकीवरून घेऊन निघाला. मात्र, पत्नीच्या मृतदेहाचा विल्हेवाट लावायला जाताना काहींनी त्याला पाहिलं, त्यांनी पोलिसांना काहीतरी संशयास्पद सुरू असल्याची माहिती दिली. पोलिसांनी राकेशला रंगेहात पकडलं आणि त्यानंतर चौकशी केली. त्याने पोलिसांना उडवा उडवीची उत्तर दिली. मात्र, आठ वर्षाच्या मुलाजवळ चौकशी केली असता पतीचं सगळं पितळ उघड पडलं. पुण्यातील नांदेड सिटी जवळ ही घटना घडली आहे. राकेश राम नाईक निसार असं आरोपीचे नाव आहे, तर बबीता निसार असं पत्नीचे नाव आहे.

आंबेगाव आणि भारती विद्यापीठ पोलिसांनी राकेश निसार याला पकडलं आणि सिंहगड रोड पोलिसांनी अटक केली. मध्यरात्री रात्री एक वाजताच्या सुमारास स्वामीनारायण मंदिर समोरून भुमकर पूलाजवळ नागरिकांना एक व्यक्ती संशयितरित्या गाडीवरून काहीतरी घेऊन जात असल्याचं पाहिलं आणि त्यानंतर त्या स्थानिकांनी पोलिसांना माहिती दिली. यावेळी भुमकर पुलाजवळ बीट मार्शल पोहोचले आणि त्याला पकडलं असता त्याने गाडी सोडून पळ काढण्याचा प्रयत्न केला. मात्र, बीट मार्शलने या राकेशला पकडलं आणि त्यावेळी राकेश कडे चौकशी करायला सुरुवात केली.

मृतदेह कोणाचा आहे? कुठून आला आहे ? तू कुठे घेऊन चाललाय? या सगळ्याची चौकशी करत असताना राकेशने उडवाउडवीची उत्तर दिली. मित्रांने हा मृतदेह मागवला आहे, त्याला खेडशिवापूर जवळ नेऊन देतो असं त्याने सांगितलं. मृत पत्नीने फाशी घेतली असल्याचंही त्याने आधी पोलिसांना सांगितलं. मात्र, पोलिसांना पुन्हा संशय बळावला आणि त्याच्याकडे पुन्हा विचारणा सुरू केली. नंतर पोलिसांनी थेट राकेशला घेऊन त्याचं धायरीतलं घर गाठलं, तेव्हा राकेश आणि बबिता यांचा आठ वर्षाचा मुलगा घरी झोपलेला दिसला. पोलिसांनी मुलाकडे चौकशी केली असता मुलांनी थेट पोलिसांना वडिलांनीच आईला मारून टाकल्याचं सांगितलं. आई आणि वडिलांमध्ये जेवणाच्या कारणावरून आणि पैसे देण्याच्या कारणावरून कायम वाद व्हायचे, आज वाद विकोपाला गेले आणि त्यानंतर बाबांनीच आईला गळा दाबून मारून टाकलं असं सांगितलं. या घटनेने परिसरात हळहळ व्यक्त होत आहे.

अधिक पाहा..