धक्कादायक! नांदेडमधील जोडप्याची हत्येपूर्वी काढली गावातून धिंड; खळबळजनक व्हिडिओ व्हायरल

नांदेड : जन्मदात्यानेच आपल्या लेकीची हत्या केल्याचा धक्कादायक प्रकार नांदेड (Nanded) जिल्ह्यात उघडकीस आला होता. या घटनेतील आणखी एक खळबळजनक प्रकार समोर आला असून सोशल मीडियात व्हिडिओ व्हायरल झाला आहे. या धक्कादायक व्हिडिओत हत्या करण्यात आलेल्या प्रेमी युगुलांची हत्या करण्यापूर्वी हात बांधून गावातून काढण्यात आल्याचं दिसून येत आहे. दोन दिवसांपूर्वी वडिलांनीच विवाहित मुलगी व तिच्या प्रियकराला हातपाय बांधून विहिरीत फेकल्याची घटना घडल्याने महाराष्ट्रात खळबळ उडाली होती. ऑनर किलींगच्या या घटनेनं नांदेड जिल्हा हादरुन गेला. आता ह्या घटनेचा व्हिडिओ समोर आला असून गावातून हातात दोरी बांधून मुलीची व मुलाची धिंड काढण्यात आल्याचं दिसून येत आहे.

नांदेडच्या उमरी तालुक्यातील करकाळा शिवारात ऑनर किलिंगची ही घटना घडली होती, ⁠नको त्या अवस्थेत मुलीला सासरच्यांनी पकडले होते. विवाहित प्रेयसीच्या सासरी भेटायला गेलेल्या प्रियकराला सासरच्या मंडळींनी नको त्या अवस्थेत रंगेहात पकडले होते.  त्यानंतर मुलीचे वडील, काका व आजोबांनी मुलीची सासरीच गावातून धिंड काढली. याप्रकरणी, ⁠मुलीचे आजोबा, काका आणि वडिलांना 5 दिवसाची कोठडी सुनावण्यात आली आहे.

जन्मदात्याने आपल्या विवाहित मुलीसह तिच्या प्रियकराला मारहाण करून, जीव घेऊन, हात-पाय बांधून विहिरीत ढकलून दिल्याची खळबळजनक घटना 2 दिवसांपूर्वी समोर आली होती. नांदेड जिल्ह्यातील गोळेगाव, (ता. उमरी) येथे सोमवारी सायंकाळच्या सुमारास ही घटना उघडकीस आली आहे. या घटनेनंतर वडिलांनी पोलिस स्टेशनमध्ये जाऊन घटनेची माहिती दिली आहे, मुलीचा मृतदेह आधी हाती लागला, तर मुलाचा मृतदेह सोमवारी रात्री 12 वाजण्याच्या सुमारास विहिरीतून बाहेर काढला.

लपूनछपून या दोघांच्या गाठीभेटी, बोलणं सुरूच

मिळालेल्या माहितीनुसार संजीवनी कमळे (19, रा. गोळेगाव) व लखन बालाजी भंडारे (19, रा. बोरजुनी) असे या घटनेतील मयत तरुण व तरुणीचे नाव आहे. बोरजुनी येथील मूळचे रहिवासी असलेल्या या दोघांचे गेल्या काही वर्षापासून प्रेम प्रकरण सुरू होते. गेल्या वर्षी संजीवनी हिचा विवाह गोळेगाव येथील एका तरुणासोबत झाला होता. तरीही लपूनछपून या दोघांच्या गाठीभेटी, बोलणं सुरूच होतं. त्यांच्या प्रेमाला मुलीच्या आई-वडिलांचा विरोध होता. रात्री उशीरा दोघांचे मृतदेह विहिरीतून बाहेर काढण्यात आले. मयत तरुणीचे वडील, काका, पती, सासू-सासरे आदींना पोलिसांनी ताब्यात घेतल्याची माहिती समोर आली आहे.

हेही वाचा

मनोज जरांगे मुंबईकडे, ओबीसी नेते नागपुरात; आरक्षण आंदोलनावर CM देवेंद्र फडणवीसांची पहिली प्रतिक्रिया

आणखी वाचा