नेपाळमधील नुवाकोट येथील विदुर नगरपालिकेत असलेल्या बेत्रावती गावात भोटेकोशी नदीच्या पुराच्या ढिगाऱ्याखाली दबलेल्या घरातून २३ जणांचे मृतदेह बाहेर काढण्यात आले आहेत.
मदत आणि बचाव कार्यात गुंतलेल्या एका पोलीस अधिकाऱ्याने दिलेल्या माहितीनुसार, मंगळवारी शोधकार्यात घरातील एका खोलीतून २१ मृतदेह सापडले, तर २ मृतदेह बाहेरून सापडले.
गेल्या बुधवारी भोटेकोशीतून जाणाऱ्या त्रिशूली नदीला आलेल्या महापुराने या तीन मजली घराला वेढा घातला होता.
पुरानंतर काही लोकांनी तीन मजले उंचावर जाऊन जीव वाचवण्याचा प्रयत्न केला पण ते पुरात अडकल्याचा पोलिसांचा अंदाज आहे. सापडलेल्या मृतदेहांची अद्याप ओळख पटलेली नाही. ते यात्रेकरू असावेत, असा पोलिसांना संशय आहे.
नुवाकोटचे एसपी विपिन रेग्मी म्हणाले, “एकाच खोलीत २१ जणांचे मृतदेह सापडले आहेत आणि दोन बाहेर आहेत. एक मृतदेह परदेशी नागरिकाचा दिसत आहे. मृतदेहासोबत बॅगही सापडल्या आहेत. ते गोसाईकुंडला जाणारे प्रवासी असावेत.”
एसपी रेग्मी यांनी दिलेल्या माहितीनुसार, हे मृतदेह छताच्या खाली असलेल्या खोलीत सापडले आहेत. एका महिलेचा मृतदेह एका चिमुरडीला तिच्या मांडीवर घेतलेला आढळून आला. दोघेही आई आणि मुलगी असण्याची शक्यता आहे.
ते म्हणाले की, पुरापासून वाचण्यासाठी पळून गेल्यानंतर लोक एका ठिकाणी जमले आणि अडकले. घरातून बाहेर काढण्यात आलेल्या २३ मृतदेहांपैकी ८ मृतदेह त्रिशूली रुग्णालयात नेण्यात आले आहेत. उर्वरित मृतदेह अजूनही घराच्या गच्चीवर ठेवण्यात आले आहेत.
Comments are closed.