बीसीसीआयचा ‘ब्रह्मास्त्र’ सज्ज, एकाच वेळी टीम इंडियाचे दोन संघ मैदानात उतरणार; श्रेयस अय्यर कर्

टीम इंडिया स्क्वॉड अपडेट मराठी बातम्या : भारतीय क्रिकेटमधील आगामी व्यस्त वेळापत्रक लक्षात घेऊन भारतीय क्रिकेट नियामक मंडळ (BCCI) टी-20 फॉरमॅटसाठी 30–35 खेळाडूंचा मोठा पूल तयार करत आहे. यामागचं प्रमुख कारण म्हणजे यंदा वर्षाअखेर होणारा वेळापत्रक ओव्हरलॅप आहे. या काळात आशियाई क्रीडा स्पर्धा आणि भारत विरुद्ध वेस्ट इंडिज टी-20 मालिका एकाच वेळी खेळवली जाणार आहे. त्यामुळे निवड समिती दोन वेगवेगळ्या, पण तितक्याच सक्षम संघांची उभारणी करत आहे, जेणेकरून भारत एकाच वेळी दोन आंतरराष्ट्रीय स्पर्धांमध्ये सहभागी होऊ शकेल. बीसीसीआयच्या मते, 2028 ऑलिम्पिकचा विचार करता संघाची खोली (depth) आणि लवचिकता (flexibility) वाढवणं आता अत्यावश्यक बनलं आहे.

आयर्लंड दौरा ठरणार नव्या चेहऱ्यांसाठी संधी

या मोठ्या योजनेची सुरुवात जून 2026 मध्ये होणाऱ्या आयर्लंड दौऱ्यापासून होणार आहे. आयर्लंडविरुद्धच्या टी-20 मालिकेसाठी बीसीसीआय मोठा संघ पाठवणार असून, यात अनुभवी खेळाडूंसोबत अनेक नवोदितांना संधी दिली जाईल. या दौऱ्याचा मुख्य उद्देश म्हणजे संभाव्य खेळाडूंना आंतरराष्ट्रीय स्तरावर तपासून पाहणं, जे पुढे आशियाई क्रीडा स्पर्धांमध्ये भारताचं प्रतिनिधित्व करू शकतील. हा प्रयोग आगामी अफगाणिस्तान मालिका आणि इतर महत्त्वाच्या स्पर्धांसाठी मजबूत बॅकअप तयार करण्यास उपयुक्त ठरेल.

IPL मधील युवा खेळाडूंवर निवडकर्त्यांची नजर

सध्या आयपीएल 2026 मध्ये दमदार कामगिरी करणाऱ्या खेळाडूंवर निवडकर्त्यांची बारकाईने नजर आहे. फलंदाजीत वैभव सूर्यवंशी, यशस्वी जैस्वाल, प्रियांश आर्य आणि अंगकृष रघुवंशी यांनी प्रभाव टाकला आहे. त्याचबरोबर रजत पाटीदार आणि आयुष बदोनी देखील आपली दावेदारी मजबूत करत आहेत.

ऑलराउंडर विभागात शशांक सिंह आणि अनुकूल रॉय संघाला आवश्यक संतुलन देऊ शकतात. गोलंदाजीत रवि बिश्नोई, प्रसिद्ध कृष्णा, कार्तिक त्यागी आणि खलील अहमद यांसारखी नावं या संभाव्य 35 सदस्यीय पूलमध्ये असू शकतात.

श्रेयस अय्यरकडे कर्णधारपदाची शक्यता

संघाच्या नेतृत्वाबाबतही बीसीसीआयकडे स्पष्ट रणनीती आहे. श्रेयस अय्यर यांना या दोन संघांपैकी एका संघाची धुरा सोपवली जाऊ शकते. तर विकेटकीपिंगसाठी ध्रुव जुरेल हे एक मजबूत पर्याय म्हणून पुढे येत आहेत. बीसीसीआयची ही रणनीती केवळ व्यस्त वेळापत्रक हाताळण्यासाठीच नव्हे, तर प्रत्येक वेळी सज्ज असलेली बेंच स्ट्रेंथ तयार ठेवण्यासाठीही महत्त्वाची ठरणार आहे.

हे ही वाचा –

Rohit Sharma Update : रोहित शर्मा मैदानात उतरणार की पुन्हा डगआऊटमध्येच बसणार? GT vs MI सामन्याआधी मोठी अपडेट

आणखी वाचा