आशियाई स्पर्धा गाजवल्यावर हिंदुस्थानचे तिरंदाज आर्चरी प्रीमियर लीगसाठी सज्ज

आशियाई क्रीडा स्पर्धा गाजवलेले हिंदुस्थानचे तिरंदाज आता पुन्हा एकदा खेळताना पाहायला मिळणार आहेत. हिंदुस्थानचे तिरंदाजीतील तारे 8 ऑक्टोबरपासून हैदराबादमध्ये सुरू होणाऱ्या आर्चरी प्रीमियर लीगच्या दुसऱ्या हंगामात उतरतील. आशियाई स्पर्धेत 17 वर्षीय कुमकुम मोहोड रिकर्व्ह तिरंदाजीमध्ये वैयक्तिक आशियाई क्रीडा सुवर्णपदक जिंकणारी पहिली हिंदुस्थानी ठरली. ज्योती सुरेखा वेन्नमने हिंदुस्थानला महिला सांघिक सुवर्णपदक कायम राखण्यास मदत केली, तर साहिल राजेश जाधवने दोन सुवर्णपदके जिंकली. आता हैदराबादमध्ये हे खेळाडू वेगवेगळ्या फ्रँचायझी संघांचा भाग म्हणून जगातील अव्वल तिरंदाजांसोबत स्पर्धा करतील. 8 ते 18 ऑक्टोबर दरम्यान नेकलेस रोडवरील पीपल्स प्लाझा येथे होणाऱ्या एपीएलच्या दुसऱ्या हंगामात सहा फ्रँचायझींमधील अठ्ठेचाळीस तिरंदाज सहभागी होतील.