RCB vs MI: त्याला तिथेच मरू द्या', क्रुणाल पांड्याबद्दल बोलताना CSK च्या माजी खेळाडूचे वादग्रस्त विधान; वाद वाढल्यावर दिलं स्पष्टीकरण!

आयपीएल 2026 मध्ये गेल्या रविवारी रॉयल चॅलेंजर्स बंगळुरूला (RCB vs MI) मुंबई इंडियन्सवर 2 गडी राखून थरारक विजय मिळाला. शेवटच्या चेंडूवर रसिख डार सलामने 2 धावा धावून आरसीबीला (RCB) विजय मिळवून दिला. मात्र, बंगळुरूच्या या विजयाचा खरा हिरो क्रुणाल पांड्या (Krunal pandya) ठरला, ज्याने 46 चेंडूंमध्ये 73 धावांची सामना जिंकवून देणारी खेळी खेळली. पण आता पांड्याच्या नावावर मोठा वाद उभा राहिला आहे, कारण तमिळ कमेंट्रीदरम्यान माजी क्रिकेटपटू एस. बद्रीनाथ यांनी असे काही विधान केले, ज्यामुळे सोशल मीडियावर त्यांच्यावर टीकेचा वर्षाव होत आहे.

क्रुणाल पांड्या जेव्हा मैदानात पाय रोवून फलंदाजी करत होता, तेव्हा त्याला वारंवार ‘क्रॅम्स’ (स्नायू आखडणे) येत होते. त्याच वेळी मुंबई इंडियन्सचा यष्टीरक्षक रायन रिकेल्टनने पांड्याला मदत केली. सहसा विरोधी संघाचे खेळाडू मदतीसाठी पुढे येत असतात. मात्र, वाद पांड्या किंवा रिकेल्टनवरून नाही, तर बद्रीनाथ यांच्या विधानावरून सुरू झाला. बद्रीनाथ यांनी तमिळ कमेंट्रीदरम्यान म्हटले की, रिकेल्टनने क्रुणाल पांड्याला मदत करायला नको होती, मग भलेही तो तिथे का मेला नसत. ट्रोलर्स यामुळे अधिक संतापले कारण बद्रीनाथ यांनी हसत-हसत ‘मरण्याबाबत’ ही कमेंट केली होती. सोशल मीडियावर निर्माण झालेला हा वाद पाहून एस. बद्रीनाथ यांना स्पष्टीकरण देणारी पोस्ट टाकावी लागली.

बद्रीनाथ म्हणाले, माझा दृष्टिकोन असा कधीच नसेल की मी म्हणेन, ‘त्याला तिथेच मरू द्या.’ मी स्वतः पुढे जाऊन त्याला स्ट्रेचिंगमध्ये मदत करेन. रायन रिकेल्टनने चांगले काम केले, ज्यासाठी त्याला आणि मुंबई इंडियन्सला फेअर प्ले पॉइंट्स मिळायला हवेत. जे लोक तमिळ समजत नाहीत, त्यांच्यासाठी मी नेमके काय म्हटले होते हे स्पष्ट करत आहे.

एस. बद्रीनाथ हे इंडियन प्रीमियर लीगमध्ये चेन्नई सुपर किंग्ससाठी खेळले आहेत. आपल्या 95 सामन्यांच्या आयपीएल कारकिर्दीत त्यांनी 1441 धावा केल्या आहेत, ज्यामध्ये 11 अर्धशतकांचा समावेश आहे. त्यांनी ऑगस्ट 2018 मध्ये क्रिकेटच्या सर्व प्रकारांतून निवृत्ती जाहीर केली होती.