BJP खासदाराच्या लेकीचा प्रधानांविरोधात एल्गार, मंत्र्यांच्या लेकीची मोदींविरोधात घोषणाबाजी

नीट निषेध: शिक्षणमंत्री धर्मेंद्र प्रधान यांच्या राजीनाम्यानंतर कॉकरोच जनता पक्षाच्या (सीजेपी) नेतृत्वाखालील विद्यार्थी आंदोलन शमले असले तरी, त्यासंदर्भातील चर्चा सुरूच आहे. या आंदोलनादरम्यान अनेक विद्यार्थी आणि तरुणांनी सरकारला उघडपणे विरोध केला होता. आता या आंदोलनाचे पडसाद भाजप नेत्यांच्या कुटुंबीयांपर्यंत पोहोचले आहेत. गेल्या काही दिवसांत अशी दोन प्रकरणे समोर आली आहेत, ज्यात भाजप नेत्यांच्या मुलींचा या आंदोलनाशी संबंध जोडला जात आहे. पहिले प्रकरण ओडिशातील आहे, जिथे भाजप खासदार अपराजिता सारंगी यांची मुलगी अर्चिता राहार हिची इन्स्टाग्राम पोस्ट व्हायरल झाली. दाव्यानुसार, अर्चिताने लिहिले होते, “मी माझी पोस्ट डिलीट करणार नाही.”

दुसरीकडे, आसामचे मंत्री केशव महंत यांची मुलगी दिबिसा महंतने स्वतः नीट पेपरफुटीविरोधातील आंदोलनात भाग घेतला होता. यावेळी तिने पंतप्रधान मोदींविरोधात घोषणाबाजीही केली होती. मुख्यमंत्री हिमंता बिस्वा सरमा यांनी म्हटले आहे की, दिबिसाच्या आंदोलनामुळे तिचे वडील केशव महंत यांना ट्रोल करू नये.

भाजप खासदाराच्या मुलीच्या इन्स्टाग्राम पोस्ट्स व्हायरल

ओडिशा भाजप खासदार अपराजिता सारंगी यांची मुलगी अर्चिता सचिन राहार हिच्या नावावर असलेल्या अनेक इन्स्टाग्राम पोस्ट्सचे स्क्रीनशॉट्स सोशल मीडियावर समोर आले आहेत. एका पोस्टमध्ये, अर्चिताने धर्मेंद्र प्रधान यांच्या राजीनाम्यानंतरचा त्यांचा फोटो पोस्ट केला आणि लिहिले, “जय हिंद.” दुसऱ्या एका पोस्टमध्ये, अर्चिताने लिहिले, “डीपी (धर्मेंद्र प्रधान) यांच्या पीएसाठी, जे नक्कीच माझ्या आईला मेसेज करून माझी आधीची स्टोरी डिलीट करायला सांगतील (असे यापूर्वीही घडले आहे), काळजी करू नका. मी ती डिलीट करणार नाही. जय जगन्नाथ! जय हिंद!” दाव्यानुसार, अर्चिताने आणखी एका पोस्टमध्ये लिहिले, “माझे कुटुंब डीपी (धर्मेंद्र प्रधान) यांच्यासोबत आहे, पण मी विद्यार्थ्यांसोबत आहे.”

हे स्क्रीनशॉट्स व्हायरल झाल्यानंतर सोशल मीडियावर एक वाद सुरू झाला. अनेक युझर्सनी अर्चिताची प्रशंसा केली, तर काहींनी पोस्ट्सच्या सत्यतेवर प्रश्नचिन्ह उपस्थित केले. या वादाच्या दरम्यान, अर्चिताचे इन्स्टाग्राम अकाउंटही गायब झाले. या नावाने कोणतेही प्रोफाइल दिसत नाही.

हे खाते अर्चिताने स्वतः निष्क्रिय केले आहे, हटवले आहे, की इतर कोणत्यातरी कारणामुळे दिसत नाही, हे अस्पष्ट आहे. या प्रकरणी अर्चिता किंवा तिच्या आई, खासदार अपराजिता सारंगी यांनी अद्याप कोणतेही अधिकृत निवेदन जारी केलेले नाही. अपराजिता सारंगी या ओडिशातील भुवनेश्वरच्या भाजप लोकसभा खासदार आहेत. राजकारणात येण्यापूर्वी त्या ओडिशा केडरच्या 1994-बॅचच्या आयएएस अधिकारी होत्या.

आसामच्या मंत्र्याच्या मुलीचा आंदोलनात सहभाग

दुसरी घटना आसाममधील आहे. राज्याचे महसूल आणि आपत्ती व्यवस्थापन मंत्री, केशव महंत यांची मुलगी, दिबिसा महंत, हिने नीट पेपरफुटी आणि परीक्षेतील अनियमिततेच्या विरोधात 23 जुलै रोजी गुवाहाटी येथे झालेल्या आंदोलनात सहभाग घेतला. या आंदोलनात केंद्रीय शिक्षण मंत्री धर्मेंद्र प्रधान यांच्या राजीनाम्याची मागणी करण्यात आली. दिबिसा पंतप्रधान मोदींच्या विरोधात घोषणाबाजी करताना आणि धर्मेंद्र प्रधान यांच्या राजीनाम्याची मागणी करतानाचे अनेक व्हिडिओ सोशल मीडियावर व्हायरल झाले. मात्र, या व्हिडिओंची पडताळणी होऊ शकली नाही.

या व्हिडिओंवर प्रतिक्रिया देताना, आसामचे मुख्यमंत्री हिमंता शनिवारी म्हणाले, “केशव महंता यांना त्यांच्या मुलीच्या आंदोलनामुळे ट्रोल केले जावे असे मला वाटत नाही. त्यांच्या मुलीला तिच्या वडिलांची राजकीय विचारधारा मान्य नसेलही. उद्या जेव्हा माझा मुलगा वकिली करायला लागेल, तेव्हा तो कदाचित मला न आवडणाऱ्या व्यक्तीची बाजूही घेईल.” या प्रकरणी आसामचे मंत्री केशव महंता यांच्याकडून तात्काळ कोणतीही प्रतिक्रिया आलेली नाही.

इतर महत्वाच्या बातम्या