Madhya Pradesh: मध्य प्रदेशातील राजगढ जिल्ह्यातील बियारा येथून एक धक्कादायक घटना उघडकीस आली असून, मुरैनाहून उज्जैनला जाणाऱ्या लग्नातील पाहुण्यांनी भरलेल्या बसला गुरुवारी सकाळी भीषण अपघात झाला. मिळालेल्या माहितीनुसार, कचरी जोडजवळ बस नियंत्रणाबाहेर जाऊन पलटी झाली, यात वराच्या आजीसह ३ जणांचा मृत्यू झाला. तर १९ जण जखमी झाल्याचे वृत्त आहे.
काय आहे संपूर्ण प्रकरण?
प्राथमिक माहितीनुसार, ट्रॅव्हल्स नावाच्या बसमधून 60 ते 70 पाहुणे रछेड गावातून उज्जैनला जात होते. सकाळी सहा वाजण्याच्या सुमारास बसचे नियंत्रण सुटून खड्ड्यात गेली, त्यामागील कारण बस चालकाने डुलकी घेतल्याचे सांगितले जात आहे. घटनास्थळी उपस्थित असलेल्या प्रत्यक्षदर्शींनी दिलेल्या माहितीनुसार, बस उसळली आणि सुमारे 10 ते 12 मीटरपर्यंत घसरली आणि खड्ड्यात पडली.
ओरडणे आणि रडणे
या घटनेमुळे बसमध्ये उपस्थित प्रवाशांमध्ये एकच खळबळ उडाली. यावेळी काही प्रवासी बसच्या सीटमध्ये अडकले, तर अनेक बसच्या खिडकीतून खाली पडले. या अपघातात 25 वर्षीय विष्णू तोमर आणि 24 वर्षीय अभय तोमर यांचा जागीच मृत्यू झाला, तर 60 वर्षीय वराची आजी बिटोली देवी यांचा गंभीर दुखापतीमुळे मृत्यू झाला.
माहिती मिळताच पोलीस आणि स्थानिक नागरिकांनी मदत आणि बचावकार्य सुरू केले. जखमींना रुग्णवाहिकेद्वारे बियोरा सिव्हिल हॉस्पिटलमध्ये नेण्यात आले, तेथे त्यांच्यावर उपचार सुरू आहेत. अनेक गंभीर जखमींना चांगल्या वैद्यकीय सुविधेसाठी दुसऱ्या रुग्णालयात पाठवण्यात आले आहे.
रुग्णांची भेट घेण्यासाठी राज्यमंत्री पोहोचले
अपघाताची माहिती मिळताच राज्यमंत्री नारायण सिंह पनवार यांनी रूग्णालयात पोहोचून रूग्णांची भेट घेतली आणि सोबतच त्यांनी पीडित कुटुंबांना सर्वतोपरी मदत करण्याचे आश्वासन दिले. या अपघातातील धक्कादायक बाब म्हणजे अपघाताच्या अवघ्या दोन तास आधी बसचा चालक बदलण्यात आला. असे असूनही नवीन ड्रायव्हरही झोपू लागला. या निष्काळजीपणामुळे तीन जणांना आपला जीव गमवावा लागला असून अनेक कुटुंबांवर मोठी हानी झाली आहे.
Comments are closed.