परळीनं कधी जात पात धर्म पाहिला नाही, माणुसकी पाहिली, माणुसकीला मतदान केलं : धनंजय मुंडे

बीड : राज्याचे माजी मंत्री आणि परळीचे आमदार धनंजय मुंडे यांनी परळी नगरपरिषदेच्या निवडणुकीनिमित्त मलिकपुरा भागात सभा घेतली. या वेळी त्यांनी विविध मुद्यांवर भाष्य केलं. राज्यात सर्वाधिक 1 लाख 42 हजार मतांनी विजयी झालो. मात्र, तेव्हापासून काही लोक माझ्या मागं लागले, असं धनंजय मुंडे म्हणाले. काही लोकांनी परळीच्या मातीला बदनाम केलं, असं धनंजय मुंडे म्हणाले. परळीनं कधी जात पात धर्म बघितला नाही. परळीनं माणुसकी बघितली आणि माणुसकीला मतदान केलं, असं धनंजय मुंडे यांनी म्हटलं.

Dhananjay Munde: काही जणांनी परळीच्या मातीला बदनाम केलं : धनंजय मुंडे

तुम्ही सर्वांनी जसं मला विजयी केलं होतं, त्याच प्रकारे इथं माझ्या उमेदवारांचा विजय झाला पाहिजे. गेल्या एक वर्षापासून तुम्ही सर्वांनी पाहिलं, विधान सभा निवडणुकीत तुम्ही इतिहास रचला, असं धनंजय मुंडे म्हणाले. 1 लाख 42 हजार मतांनी मला विजयी केलं. तो विजय तुमच्या प्रेम आणि विश्वासामुळं मिळाला. मला जितकी मतं मिळाली 1 लाख 95 हजार ती राज्यात कुणाला मिळाली नाहीत.  हा तुमचा विश्वास माझ्यावर आहे, असं धनंजय मुंडेंनी म्हटलं. माहिती नाही तेव्हापासून काय झालं लोक माझ्या मागं लागले. जर मागं लागायचे आहे तर माझ्या एकट्याच्या मागं लागा. मी काही केलंय असं वाटत असेल तर माझी बदनामी करा, असं मुंडे यांनी सांगितलं. एक वर्षापासून मी मीडिया ट्रायलचा सामना करतोय, त्याचं दु:ख नाही, दु:ख या गोष्टीचं आहे ज्यांनी या परळीला बदनाम केलं, परळीच्या मातीला बदनाम केलं, परळीच्या मातीत राहणाऱ्या लोकांना बदनाम केलं. त्या सर्वांना उत्तर द्यायचं असेल तर निवडणुकीचे निकालातून दिलं पाहिजे, असं आव्हान मुंडे यांनी केलं.

परळीनं माणुसकीला मतदान केलं : धनंजय मुंडे

धनंजय मुंडे पुढे म्हणाले, परळीच्या मलिकपुरा येथे असा विजय आपल्या उमेदवारांना द्या, म्हणजे विजय इथं होईल आणि थप्पड कुठं दुसरीकडे पडेल. या निवडणुकीत नगराध्यक्षपदाची निवडणूक आपण जिंकली आहे.  90 टक्के नगरसेवकांची निवडणूक आपण जिंकली आहे. जेव्हा मी रडतो तेव्हा तो निकाल येतो. काही लोक अपक्ष उभे आहेत.माणिकनगरमध्येही उमेदवार उभे आहेत. पण या परळीनं कधी जात पात धर्म बघितला नाही. परळीनं माणुसकी बघितली आणि माणुसकीला मतदान केलं आहे, असं मुंडेंनी म्हटलं.

आपलं मतदान कुठल्याही अपक्षाला, कुठल्याही पक्षाच्या उमेदवाराला घड्याळ सोडून मत देऊन मत वाया घालवू नका. नोटरी करुन देऊ का, विजय इथं होतोय तर आपलं मत का वाया घालवताय. लोकशाहीत एका मताची किंमत खूप असते, असं धनंजय मुंडे म्हणाले.

मलिकपुरा येथील काही रस्त्याची कामं बाकी आहेत. येत्या एप्रिल महिन्यापर्यंत मलिकपुरा येथील एकही रस्ता, एकही नाला, सर्व काम करेन. परळी शहराची हद्दवाढ झाली आहे, सही झाली आहे. मंत्रालयात फाईल जाईपर्यंत काही वस्त्या वाढल्या त्यामुळं उशीर झाला. मलिकपुऱ्याची हद्द देखील वाढली आहे. जानेवारीत त्याचं नोटिफिकेशन काढणार आहे,हे माझं वचन आहे, असं धनंजय मुंडे म्हणाले.

आणखी वाचा