गोव्याचे माजी विकास आयुक्त राकेश मेहतांची आत्महत्या, इमारतीत गळफास लावलेल्या अवस्थेत आढळला मृतदेह – TMarathiNews

नवी दिल्ली : दिल्लीचे माजी मुख्य सचिव आणि १९७५च्या तुकडीतील ज्येष्ठ आयएएस अधिकारी राकेश मेहता यांनी आत्महत्या केल्याची धक्कादायक घटना समोर आली आहे. ६ सप्टेंबर रोजी नोएडातील सेक्टर ८२ येथील केंद्रीय विहार-२ सोसायटीतील त्यांच्या निवासस्थानी ते मृतावस्थेत आढळले. पोलिसांनी घटनास्थळावरून एक चिठ्ठीही जप्त केली असून, त्यात दीर्घकाळापासून सुरू असलेल्या आजारपणाचा उल्लेख असल्याचे अधिकाऱ्यांनी सांगितले.

राकेश मेहता यांनी तीन दशकांहून अधिक काळ प्रशासकीय सेवेत महत्त्वाच्या जबाबदाऱ्या सांभाळल्या. २००७ ते नोव्हेंबर २०१० या काळात ते दिल्लीचे मुख्य सचिव होते. त्यांच्या कार्यकाळात २०१०च्या राष्ट्रकुल क्रीडा स्पर्धांच्या तयारीसह दिल्लीतील नागरी, वाहतूक आणि वीज क्षेत्रातील विविध महत्त्वाच्या प्रकल्पांवर काम झाले. यापूर्वी त्यांनी दिल्ली महानगरपालिकेचे आयुक्त तसेच दिल्ली परिवहन महामंडळाशी संबंधित महत्त्वाच्या पदांवरही काम केले होते.

गोव्यातही सांभाळली महत्त्वाची जबाबदारी

राकेश मेहता यांनी आपल्या प्रशासकीय कारकिर्दीत गोव्यात वीज सचिव आणि त्यानंतर विकास आयुक्त म्हणूनही काम केले होते. गोव्यातील प्रशासकीय आणि विकासाशी संबंधित महत्त्वाच्या जबाबदाऱ्या त्यांनी सांभाळल्या. त्यांच्या दीर्घ प्रशासकीय अनुभवामुळे गोवा तसेच दिल्लीतील प्रशासनात त्यांची स्वतंत्र ओळख होती.

आजारपणाचा चिठ्ठीत उल्लेख

पोलिसांच्या माहितीनुसार, मेहता यांच्या निवासस्थानी सापडलेल्या चिठ्ठीत आरोग्य आणि मानसिक समस्यांमुळे टोकाचे पाऊल उचलल्याचा उल्लेख आहे. तसेच, आपल्या मृत्यूसाठी कोणालाही जबाबदार धरू नये, असेही नमूद असल्याचे पोलिसांनी सांगितले. या प्रकरणाचा तपास सुरू असून चिठ्ठी आणि घटनास्थळावरील इतर पुराव्यांची तपासणी केली जात आहे.

घटनेच्या वेळी मेहता यांच्या पत्नी देहरादून येथे मुलाला भेटण्यासाठी गेल्या होत्या. त्यांच्याशी संपर्क होऊ न शकल्याने कुटुंबीयांनी सोसायटीच्या सुरक्षा कर्मचाऱ्यांना माहिती दिली. त्यानंतर पोलिसांनी घटनास्थळी पोहोचून तपास सुरू केला. कायदेशीर प्रक्रिया पूर्ण झाल्यानंतर त्यांच्यावर दिल्लीतील लोधी रोड स्मशानभूमीत अंत्यसंस्कार करण्यात आले.

ज्येष्ठ सनदी अधिकारी म्हणून राकेश मेहता यांनी दिल्लीसह गोव्याच्या प्रशासकीय क्षेत्रातही महत्त्वपूर्ण योगदान दिले होते. त्यांच्या निधनाने प्रशासकीय वर्तुळात हळहळ व्यक्त होत आहे.